बार्शी (सोलापूर) : शहरातील काँग्रेस अध्यक्षाचा मोबाईल बळजबरीने घेऊन त्यातील डेटा व्हायरल करीन, मुलाबाळासह जीवंत जाळीन, बदनामी करीन अशी धमकी दिल्याप्रकरणी बार्शी शहर पोलिसांत नगर पालिकेच्या विरोधी पक्षनेत्यांसह तीन जणांविरोधात अदखलपात्र गुन्हा दाखल झाल्याने राजकीय क्षेत्रात खळबळ उडाली आहे. (barshi city police filed an unsolved crime against the municipal opposition leader)

नागेश हरिभाऊ अक्कलकोटे ( विरोधी पक्षनेता रा.खुरपे बोळ), राकेश उर्फ बाळू तातेड (रा. सुभाषनगर), पंकज शिंदे (रा.कसबा पेठ) अशी गुन्हा दाखल झालेल्यांची नावे आहेत. जीवनदत्त महादेव आरगडे (रा.जिजामाता कॉलनी) यांनी फिर्याद दाखल केली. ही घटना शुक्रवार (ता.२८) रोजी सायंकाळी साडेसहाच्या दरम्यान घडली.

काँग्रेस (आय) पक्षाचे शहर अध्यक्ष जीवनदत्त आरगडे भगवंत मंदिराकडे जात असताना तानाजी चौक येथील प्लाझा मंगल कार्यालयाजवळ तिघांनी अडवून माजी आमदार दिलीप गंगाधर सोपल यांच्याविरुध्द व नागेश अक्कलकोटे यांची सक्तवसुली संचलनालय कार्यालय मुंबई येथे दिलेली बेहिशोबी मालमत्ता चौकशीची तक्रार मागे घ्यावी, तसेच आर्यन शुगर्स लि.खामगाव या साखर कारखान्याबाबत मुंबई उच्च न्यायालय येथे कसलीही याचिका दाखल करु नये अन्यथा मुलांबाळासह जीवंत जाळून टाकीन अशी धमकी दिली.

मोबाईल फोन घेऊन फोटो, रेकॉर्डिंग डेटा व्हायरल करुन तुझी बदनामी करीन असे म्हणून शिवीगाळ केली असल्याचे अदखलपात्र फिर्यादीत आरगडे यांनी म्हटले आहे. बार्शी पोलिस तपास करीत आहेत. (barshi city police filed an unsolved crime against the municipal opposition leader)