सोलापूर : एसटी महामंडळाचे राज्यशासनात विलिनीकरणाच्या मागणीसाठी कर्मचाऱ्यांनी गेल्या ८० दिवसांपासून संप पुकारला आहे. परंतु, या मागणीकडे सरकार दुर्लक्ष करत असल्याने प्रजासत्ताक दिनी संपकरी कर्मचाऱ्यांनी आक्रमक होत विभाग नियंत्रक विलास राठोड यांच्यासमोर भीक मांगो आंदोलन केले.

सोलापुरात संपकरी एसटी कर्मचाऱ्यांनी आपल्या सहकाऱ्यांबरोबर हे ‘भीक मांगो’ आंदोलन केले. यातून जमा झालेली रक्कम राज्य सरकारला देण्यात येणार असल्याचे त्यांनी सांगितले. गेल्या ८० दिवसांपासून एसटी कर्मचाऱ्यांनी विलिनीकरणाच्या मागणीसाठी संप पुकारला आहे. परंतु, सरकार त्याकडे दुर्लक्ष करत असल्याने एसटी कर्मचारी आक्रमक झाले आहेत. यामुळे राज्य सरकारचे लक्ष वेधण्यासाठी सोलापूर एसटी आगारातील संपकरी एसटी कर्मचाऱ्यांनी प्रजासत्ताक दिनी आंदोलन केले.

महिला कर्मचारीही होत्या सहभागी

एसटीच्या विभागीय कार्यालयापासून एसटी स्टॅंडपर्यंत भीक मागून राज्य सरकारचा निषेध करण्यात आला. एसटी कर्मचाऱ्यांनी दुकानदार, पादचारी, वाहनधारक अशा सर्वांकडे भीक मागितली. या आंदोलनात महिला कर्मचारीदेखील सहभागी झाले होते. यातून जमा झालेली रक्कम ही मुख्यमंत्री सहाय्यता निधीमध्ये जमा करण्यात येणार असल्याचे सांगण्यात आले.