करमाळा (सोलापूर) : पांडे (ता. करमाळा) येथील गवंडी काम करणाऱ्या रामचंद्र दुधे यांचा मुलगा महेश दुधे हा सीबीएसईच्या बारावी बोर्ड परीक्षेत 94.60 टक्के गुण मिळवून सोलापूर जिल्ह्यात प्रथम आला. त्याला कॉम्प्युटर इंजिनिअर व्हायचे आहे. 

हेही वाचा : ऑनलाइन व थेट विक्रीअभावी भाजीपाला उत्पादकांना बसतोय लाखोचा फटका 

सुटीला आल्यानंतर अनेक वेळा वडिलांबरोबर जाऊन बिगारी काम करणारा महेश आज सीबीएसईच्या बारावी परीक्षेत 94.60 टक्के गुण मिळवून जिल्ह्यात पहिला आल्याने त्याचे सर्वत्र कौतुक होत आहे. महेशचे इयत्ता पाचवीपर्यंतचे शिक्षण जिल्हा परिषद प्राथमिक शाळा, पांडे येथे झाले आहे. त्यानंतर इयत्ता सहावीसाठी त्याची नवोदय विद्यालय, पोखरापूर येथे निवड झाली. घरची हलाखीची परिस्थिती लक्षात घेऊन महेशने चिकाटीने अभ्यास केला व हे यश मिळवले आहे. 

हेही वाचा : धक्कादायक : "या' तालुक्‍यातील सबजेलमधील 28 कैद्यांसह दिवसभरात 34 कोरोना पॉझिटिव्ह रुग्ण आढळल्याने खळबळ 

पांडे येथील रामचंद्र दुधे यांना कसलीही जमीन नाही. त्यामुळे त्यांचे रोजंदारी गवंडी कामावरच चालते. त्यांची पत्नी तुळसाबाई या देखील मोलमजुरी करतात. त्यांना एक मुलगा व एक मुलगी आहे. दोन्ही मुलांना चांगले शिक्षण दिले पाहिजे, या भूमिकेतून ते कष्ट करत राहतात मुलगी बीएस्सीच्या शेवटच्या वर्षात शिकत आहे. 

वडिलांच्या कष्टाची जाणीव ठेवून यापुढेही शिकणार
याबाबत महेश म्हणाला, नवोदय विद्यालयात शिकत असताना आपले आईवडील आपल्यासाठी खूप कष्ट करतात याची जाणीव ठेवून सहावीपासून अभ्यास करत आहे. मी जेव्हा सुटीला गावी यायचो तेव्हा वडिलांबरोबर अनेक वेळा कामावर जात होतो. मी स्वतःही अनेक वेळा वडिलांच्या हाताखाली बिगारी काम केले आहे, त्यामुळे वडिलांना किती कष्ट सोसावे लागतात याची जाणीव मला होत असे. आई व वडील यांच्या कष्टाची जाणीव ठेवूनच यापुढेही शिकणार आहे. मला पुढे जाऊन कॉम्प्युटर इंजिनिअर व्हायचे आहे. 

मुलीच्या शिक्षणासाठी माझी कष्ट करण्याची तयारी
महेशचे वडील रामचंद्र दुधे म्हणाले, मी करमाळा शहर व परिसरातील गावांमध्ये गेल्या 20 वर्षांपासून गवंडी काम करतो. आपल्या वाट्याला जे कष्ट आले आहेत, ते मुलांच्या वाट्याला येऊ नये म्हणून मुलांच्या शिक्षणावर आम्ही भर देत आहोत. महेश सहावीपासून नवोदय विद्यालय, पोखरापूर येथे शिकतो. तिथे त्याने खूप कष्टाने अभ्यास केला. कुठलीही तक्रार न करता तो सतत अभ्यास करत असतो. यापुढेदेखील मुलीच्या शिक्षणासाठी माझी कष्ट करण्याची तयारी आहे. 

संपादन : श्रीनिवास दुध्याल