बार्शी (सोलापूर) ः कोरोना आजारामुळे सर्व प्रकारचे व्यवसाय व सेवा बंद झाल्याने हातावरचे पोट असणाऱ्या लोकांच्या उपासमारीचा प्रश्‍न मांडण्यासाठी डफली वाजवून आंदोलन करण्यात आले. 

मागील 25 मार्चपासून सार्वजनिक बससेवा बंद आहे. इतर वाहनाची वाहतूक देखील परवानगी शिवाय नाही. कार्यालये, बाजारपेठ, हॉटेल बंद ठेवून निर्बंध घालण्यात आले. हातावरचे पोट असणाऱ्या नागरिकांची उपासमार होत आहे. चार महिने होऊन गेले ही सेवा बंद असून त्या त्वरीत सुरु कराव्यात अशी मागणी करीत डफली वाजवून बार्शी शहर बसस्थानकासमोर बहुजन वंचित आघाडीने बुधवारी आंदोलन केले. 

हेही वाचाः त्याला समर्थ व्हायचे आहे ! अस्थिव्यंग युवकाची स्वावलंबित्वासाठी धडपड 

कोरोना प्रतिबंधक उपाययोजनेत सुधारणा करण्याची गरज आहे. कोरोना नियंत्रणाचे सूत्र ठरवले पाहिजे. 15 टक्के जनता उपचार घेत आहे. 80 टक्के जनतेवर बेरोजगार,उपासमारीची वेळ आली आहे.निर्बंध घातल्याचे दुष्परिणाम समोर आले असून 100 टक्के जनतेवर निर्बंध लागू करण्यात आले आहेत. या सर्व घटनांचा आढावा घेऊन त्वरीत जिल्हाबंदी उठवावी, बससेवा सुरू करावी, उद्योग, व्यवसाय सुरु करण्यास परवानगी द्यावी अशा मागण्या निवेदनात करण्यात आल्या आहेत. 

हेही वाचाः पंढरपुरात सहायक पोलिस निरिक्षकांचा अपघाती मृत्यू 

निवेदन नायब तहसीलदार संजीवन मुंढे व आभार व्यवस्थापक वाकडे यांना देण्यात आले. याप्रसंगी वंचितचे शहर अध्यक्ष धनंजय जगदाळे,तालुका अध्यक्ष समाधान भालशंकर, अर्जुन चव्हाण, वैभव पाटील, शोएब सय्यद, वसिम मुलाणी, संतोष कांबळे, बालाजी गोरे, स्वप्निल चौधरी, किशोर काकडे, स्वप्नील लंकेश्वर, किशोर ढोले, बाळासाहेब माने उपस्थित होते. 
 
संपादन ः प्रकाश सनपूरकर