मळेगाव (सोलापूर) : कोरोनापासून बचाव करण्यासाठी संपूर्ण देशभरात लॉकडाउन पुकारला आहे. संचारबंदी व विविध कलमे लागू केल्यामुळे टोमॅटो उत्पादक शेतकऱ्यांसमोर विक्रीसाठी आलेला टोमॅटो विकायचा कसा हा गंभीर प्रश्‍न निर्माण झाला आहे. मागणी व उठावाचा अभाव तसेच जमावबंदीमुळे व्यापारी, शेतमजूर यांनी पाठ फिरवल्याने बार्शी तालुक्‍यातील पिंपरी (सा.) येथील टोमॅटो उत्पादक शेतकरी शशिकांत विश्‍वंभर काशीद यांच्या शेतात लाल चिखल तयार झाला आहे. 
सोन्यासारखा चमकणारा टोमॅटो डोळ्यासमोर खराब होत असल्याचे पाहून संपूर्ण कुटुंबच धास्तावले आहे. नांगरणी, ड्रीप, मल्चिंग पेपर पसरणी, रोप लागवड, औषध फवारणी, सुतळी, बांबू, तार आदींसाठी एक एकर टोमॅटो लागवडीसाठी दीड लाख रुपये इतका खर्च आला असून त्यातून मिळणारे उत्पन्न केवळ 15 हजार रुपये इतके मिळाले आहे. 
25 किलो वजनाच्या कॅरेटला केवळ 30 रुपये इतका भाव मिळत असल्याने उभ्या पिकात नांगर फिरवण्याची वेळ आली आहे. शेतात जागोजागी टोमॅटोचे ढीग साचले आहेत. अवकाळी पाऊस, वाढती उष्णता, संचारबंदी, मालाचे गडगडले दर, ग्राहकांनी व मजुरांनी फिरवलेली पाठ यामुळे 
शेतकरी मात्र कोरोनाच्या व निसर्गाच्या दुष्टचक्रात पुरता अडकला आहे. 
एक एकर टोमॅटो लागवडीसाठी दीड लाख रुपये इतका खर्च आला आहे. कोरोनाच्या पार्श्‍वभूमीवर देशात लॉकडाउन पुकारला असल्यामुळे त्याचा फटका टोमॅटो पिकाला बसला आहे. संचारबंदीमुळे माझे तीन लाख रुपयांचे आर्थिक नुकसान झाले आहे. शासनाने टोमॅटो उत्पादक शेकऱ्यांना नुकसानभरपाई देत मदतीचा हात द्यावा, अशी मागणी शशिकांत काशीद यांनी केली आहे.