बेगमपूर(सोलापूर) : कामती बु. (ता. मोहोळ) पोलिस ठाण्याच्यावतीने 28 गावातील पोलिस पाटील यांना कोविड योद्धा म्हणून गौरविण्यात आले. 
जिल्हा पोलिस अधीक्षक मनोज पाटील यांचे मार्गदर्शनाखाली सोलापूर उपविभागीय पोलिस अधिकारी प्रभाकर शिंदे यांचे प्रमुख उपस्थितीत कार्यक्रमाचे आयोजन करण्यात आले होते. 

हेही वाचाः अबब ! अकलुज उपप्रादेशिक परिवहन कार्यालयाने मिळवला तब्बल चार अब्जांचा महसूल 

कामती पोलिस ठाण्याचे सहाय्यक पोलिस निरीक्षक किरण उंदरे यांनी उपस्थितीचे स्वागत केले. कोरोनाच्या पार्श्वभूमीवर मागील पाच महिन्यापासून कामती पोलिस ठाण्यांतर्गत 28 गावातील पोलिस पाटील, पोलिस मित्र व कमांडो यांनी पोलिस प्रशासनाला केलेले सहकार्य, कोरोनाबाबत नागरिकांना सतर्क राहण्याच्या दृष्टीने केलेल्या उल्लेखनीय कार्याची दखल घेत पोलिस ठाण्याच्यावतीने कोविड योध्दा म्हणून प्रमाणपत्र व श्रीफळ देऊन उपविभागीय पोलीस अधिकारी प्रभाकर शिंदे यांचे हस्ते सत्कार करण्यात आला. 

हेही वाचाः सोलापूर ग्रामीणमध्ये आज आढळले 214 कोरोना बाधित 

यावेळी शिंदे यांनी पोलिस पाटील हे पोलिस ठाणे व नागरीक यांच्यातील मुख्य दुवा असून त्यांच्या कार्याची पोच म्हणून व प्रेरणा देण्यासाठी हा गौरव करण्यात आला असल्याचे सांगितले. यावेळी कामती पोलिस ठाण्याचे सहाय्यक पोलिस निरीक्षक किरण उंदरे, पोलिस नाईक बबलू नाईकवाडी, हेड कॉन्स्टेबल अमोल नायकोडे, पोलिस शिपाई संदीप काळे, तालुका पोलिस पाटील संघटनेचे अध्यक्ष ज्ञानेश्वर पवार, सचिव नितीन उघडे, जिल्हा प्रसिद्धीप्रमुख शंकर पाटील, पोलिस पाटील नितीन फराटे, दत्तात्रय फडतरे, वसंत पाटील, म्हाळाप्पा पाटील, आरती माळी, उत्तम पाटील, अप्पासाहेब रासेराव आदींसह पोलिस पाटील, पोलिस मित्र उपस्थित होते. 

संपादन ः प्रकाश सनपूरकर