बार्शी(सोलापूर): अखिल भारतीय किसान सभा, सोलापूर जिल्हा कौन्सिलच्या वतीने भाजप केंद्र सरकारच्या शेतकरीविरोधी आणि श्रमिकविरोधी धोरणांच्या निषेधार्थ 27 मे रोजी देशव्यापी विरोधाच्या हाकेला प्रतिसाद देत शेतकरी बांधवांनी आपल्या शेती बांधावरूनच आंदोलन केले आहे. 

हेही वाचाः महावितरणचा नवा उपक्रम एक गाव एक दिवस 

आंदोलनाचे निवेदन पंतप्रधान, मुख्यमंत्री व जिल्हाधिकाऱ्यांना मेलद्वारे पाठवण्यात आले आहे. निवेदनात म्हटले आहे, पंतप्रधान नरेंद्र मोदींनी आपल्या भाषणात 20 लाख कोटी रुपयांचे विशेष पॅकेज जाहीर केले, परंतु अर्थमंत्री निर्मला सीतारामन यांचा तपशील भांडवलदारधार्जिणा आहे. शेतकरी, शेतमजूर आणि कामगार या देशातील तिन्ही श्रमिक वर्गांसाठी अत्यंत तुटपुंजा आणि निरर्थक आहे. 

हेही वाचाः सोलापुरातील कॉंग्रेस नेत्याच्या मुलाला कोरोना 

सुमारे 20 कोटी कामगारांना त्यांच्या गावी पोचवावे. त्यांना अन्न, रोजगाराची व योग्य वेतनाची हमी द्यावी. शेतकरी, शेतमजुरांची संपूर्ण कर्जमुक्ती करावी. भांडवलदारांना 68 हजार 607 कोटी रुपयांची कर्जमाफी दिली, तशीच शेतकरी व शेतमजुरांची कर्जमाफी करावी. येत्या खरिपासाठी शेतकऱ्यांना बॅंकांकडून पीककर्ज, मोफत बी-बियाणे व खते द्यावीत, रब्बीची नुकसानभरपाई द्यावी. शेतकरी, शेतमजूर, असंघटित कामगारांच्या प्रत्येक कुटुंबाला केंद्र सरकारकडून लॉकडाउन काळात दरमहा 10 हजार रुपये थेट मदत करा, 
मनरेगाच्या कामांचा विस्तार करून कामाची कोट्यवधी रुपयांची थकबाकी द्या, पंतप्रधान किसान सन्मान योजनेत सहा हजारावरून 10 हजार रुपयांपर्यंत वाढ करावी. शेतीमालाला स्वामिनाथन आयोगाच्या शिफारशीनुसार उत्पादन खर्चाच्या दीड पट हमीभाव द्यावा. 
आंतरराष्ट्रीय तेलभाव उतरल्याने 22 रुपयांनी डिझेल द्यावे, वनजमीन, देवस्थान व इनाम जमीन, गायरान जमीन कसणाऱ्यांच्या नावे करा, कोरोनाचा विदारक अनुभव लक्षात ठेवून ग्रामीण व शहरी भागांमध्ये सार्वजनिक आरोग्य व्यवस्थेमध्ये आमूलाग्र सुधारणा कराव्यात. 
किसान सभेचे कॉम्रेड तानाजी ठोंबरे, लक्ष्मण घाडगे, लहू आगलावे, ए. बी. कुलकर्णी, धनाजी पवार, भारत पवार, किसान मुळे, प्रवीण मस्तूद, अनिरुद्ध नकाते, शौकत शेख, शिवाजी घाडगे, बालाजी ताकभाते, सुभाष कंगळे, रामेश्‍वर शिकेतोडे, पैगंबर मुलाणी, बाळासाहेब जगदाळे, नाना बराते, प्रमोद डोईफोडे, लक्ष्मण गव्हाणे, गणपत गायकवाड, विष्णू लोखंडे, शेलार, विलास गोंदिल यांनी आंदोलन यशस्वी केले.