पंढरपूर(सोलापूर)ः कोरोनामुळे ग्रामीण भागातील शेतकरी आणि शेतमजूरांना मोठा फटका बसला आहे. गेल्या चार महिन्यांपासून कामधंदा नसल्याने शेतकरी व शेतमजूर आर्थिक संकटात आले आहेत. या संकटात सापडलेल्या शेतमजुरांच्या मुलांसाठी खरसोळी (ता.पंढरपूर) येथील शेतकरी पुत्र योगेश आसबे हा तरुण मदतीसाठी धावून आला आहे. 

हेही वाचाः खरिपासाठी 1 लाख 26 हजार शेतकऱ्यांनी उतरविला पीक विमा 

गावातील 12 वी पास झालेल्या गरीब शेतमजुरांच्या मुलांना त्यांनी मोफत शैक्षणिक साहित्याचे वाटप केले आहे. दोन गरीब विद्यार्थ्यांचा पदवी पर्यंतचा खर्च देखील उचलला आहे. कोरोना संसर्ग रोगामुळे सर्वत्र लॉकडाऊन सुरू आहे. लॉकडाऊनमुळे सर्वत्र उद्योग व्यवसाय ठप्प झाले आहेत. शेतकरी आणि शेती व्यवसायाला ही याचा मोठा फटका बसला आहे. शेतीवर अवलंबून असणारे शेतकरी आणि शेतमजुर ही अडचणीत सापडले आहेत. 

हेही वाचाः विद्यार्थी फार्मसी, डिझायनिंग, बॅंकिंगसोबत घेत आहेत आवडीच्या क्षेत्रात घेत आहेत करिअरचा शोध 

अशातच सध्या शाळा आणि महाविद्यालये सुरू होण्याच्या मार्गावर आहेत. परंतु गरीब शेतकरी आणि मजुरांकडे पैसे नसल्याने शैक्षणिक साहित्य खरेदी करण्यास अडचणी येऊ लागल्या आहेत. शेतकरी आणि मजूरांची आर्थिक अडचण लक्षात घेऊन येथील शेतकरी पुत्र योगेश आसबे यांनी गावातील गरीब विद्यार्थ्यांसाठी 40 हजार रूपयाचे शैक्षणिक साहित्य मोफत वाटप केले आहे. याशिवाय त्यांनी गावातील दोन गरीब विद्यार्थ्यांचा पदवीचे शिक्षण पूर्ण करण्यासाठी लागणारा खर्च उचलला आहे. शंकर पवार यांच्या उपस्थितीत शैक्षणिक साहित्याचे वाटप करण्यात आले. यावेळी दिगंबर कांबळे,सचिन आसबे, अजित पवार,काका ताड,दिलीप पवार,सुमन कसबे, अंगद पवार आदी उपस्थित होते. 
 
संपादनः प्रकाश सनपूरकर