पंढरपूर (सोलापूर) : कोरोना महामारीमुळे प्रशासकीय यंत्रणेकडून प्रमाणपत्रे मिळण्यास झालेला विलंब पाहता, अनेक विद्यार्थी अजूनही प्रवेश प्रक्रियेपासून वंचित आहेत. याचा विचार करून प्रथम वर्ष डी. फार्मसीसाठी विद्यार्थ्यांना रजिस्ट्रेशन करण्यासाठी शासनाने आणखी मुदतवाढ दिली आहे. 

हेही वाचा : कोरोना संकटात गटविकास अधिकारी रजेवर! प्रलंबित कामांचा मात्र होतोय खेळखंडोबा 

महाराष्ट्र राज्य तंत्रशिक्षण मंडळ, मुंबई म्हणजेच एमएसबीटीईमार्फत चालवल्या जाणाऱ्या बारावी सायन्सनंतरच्या डी. फार्मसी रजिस्ट्रेशनसाठी मुदत वाढवली असून, 4 सप्टेंबर अखेरपर्यंत विद्यार्थ्यांना ऑनलाइन अर्ज भरता येणार आहे. याअगोदर रजिस्ट्रेशन करण्याची मुदत 25 ऑगस्टपर्यंतच होती; परंतु त्यात आता मुदत वाढवून दिली आहे. विद्यार्थ्यांना 4 सप्टेंबरपर्यंत मुदत दिल्याने डी. फार्मसीमध्ये करिअर करू इच्छिणाऱ्या विद्यार्थ्यांना या मुदतवाढीमुळे आणखी संधी मिळाली आहे, अशी माहिती श्री विठ्ठल एज्युकेशन अँड रिसर्च इन्स्टिट्यूट कॉलेज ऑफ फार्मसी (डी. फार्मसी), पंढरपूरचे प्राचार्य प्रा. सतीश मांडवे यांनी दिली. 

हेही वाचा : रेशनमधून चार महिन्यात वाटप झाले "इतके' लाख मेट्रिक टन धान्य 

यानंतर तात्पुरती गुणवत्ता यादी डीटीईच्या संकेतस्थळावर 7 सप्टेंबर रोजी विद्यार्थ्यांना पाहता येणार आहे. जर प्रवेश अर्जामध्ये काही त्रुटी असतील तर दुरुस्ती 8 ते 10 सप्टेंबर यादरम्यान करता येईल. त्यानंतर 12 सप्टेंबर रोजी विद्यार्थ्यांना अंतिम गुणवत्ता यादी डीटीईच्या संकेतस्थळावर पाहता येईल. 25 ऑगस्ट ते 4 सप्टेंबर रोजी सायंकाळी पाच वाजेपर्यंत रजिस्ट्रेशन करता येणार आहे. प्रवेशासाठी लागणारी आवश्‍यक कागदपत्रे पडताळणी करून रजिस्ट्रेशन करता येणार आहे. यंदाही स्वेरी कॉलेजला पालकांनी व विद्यार्थ्यांनी पहिली पसंती दिली आहे. संस्थेचे संस्थापक- सचिव डॉ. बी. पी. रोंगे यांच्या मार्गदर्शनाखाली व प्राचार्य प्रा. सतीश मांडवे यांच्या नेतृत्वाखाली सुविधा केंद्राचे कामकाज सुरू आहे. या अनुषंगाने सुविधा केंद्रावर पालकांची व विद्यार्थ्यांची प्रचंड गर्दी पाहावयास मिळते आहे. या मुदतवाढीचा लाभ बारावी उत्तीर्ण विद्यार्थी व त्यांच्या पालकांनी तसेच अजून ज्यांना डी. फार्मसीमध्ये प्रवेश घ्यायचा आहे, परंतु अद्यापही ज्यांनी रजिस्ट्रेशन केले नाही त्यांना घेता येणार आहे. 

या कालावधीत प्रमाणपत्रांची पडताळणी, छाननी व नोंदणी आदी प्रक्रियेनंतर मुख्य कॅप राउंडसाठी ऑप्शन फॉर्म भरण्याची ऑनलाइन प्रक्रिया चालू होणार आहे. डी. फार्मसी प्रवेशासंबंधी अधिक माहितीसाठी संपर्क साधावा, असे आवाहन प्राचार्य प्रा. सतीश मांडवे यांनी केले आहे. स्वेरीचे संस्थापक सचिव डॉ. बी. पी. रोंगे यांच्या मार्गदर्शनाखाली डी. फार्मसीच्या फॅसिलिटेशन सेंटरमध्ये सर्व यंत्रणा सज्ज असल्याचे दिसून येत आहे. 

संपादन : श्रीनिवास दुध्याल