मोहोळ (सोलापूर): लोखंडी खांंबाला बांधलेल्या वासराचा गळ्यातील दोर न तुुुटल्याने बिबट्याने चारच दिवसाच्या अंतराने शिरापुर (सो) येथे शुक्रवार (ता.६) च्या मध्यरात्री फडशा पाडल्याची घटना शिरापूर येथे घडली. यामुळे शेतकऱ्यामध्ये प्रचंड भितीचे वातावरण निर्माण झाले आहे.

याबाबत अधिक माहिती अशी की, शिरापूर (सो) येथील पिडीत शेतकरी भारत उर्फ (बापू ) अशोक ताकमोगे यांची लांबोटी-शिरापूर रोडवर पिरसाहेब  देवस्थानाजवळ शेती आहे .स्वत:च्या शेतामध्येच त्यांनी जनावरासाठी उभा केलेल्या शेडमध्ये जनावरे बांधली होती. गुरुवारी (ता. पाच) रोजी रात्री नऊच्या दरम्यान ताकमोगे यांनी जनावरांना चारा देऊन घरी आले होते. दुसऱ्या दिवशी शुक्रवार (ता.सहा) रोजी सकाळी सहाच्या दरम्यान जनावराचे दूध काढण्यासाठी शेडकडे गेले असता दावणीलाच एका जर्सीगाईच्या वासराचे पोट फाडून खाल्ल्याचे दिसले. वासराच्या गळ्यालाही दात लागले असून वासराला  बांधलेली नवीन दोरी न तुटल्यामुळे वासराला जागेवरच फडशा पाडला. त्याचा एक पाय बिबट्या घेऊन गेला आहे.  

मंगळवारी (ता.3) ऑगस्ट रोजी दिग्वीजय ताकमोगे यांच्या वासराचा फडशा बिबट्याने पाडला होता. त्यामुळे दोन्हीही पिडीत शेतकरी ताकमोगेच असून दोघांच्या शेतातील अंतर मात्र सुमारे चार ते पाच किलोमीटर आहे. अवघ्या चारच दिवसाच्या अंतराने शिरापूरमध्ये बिबट्याने पाळीव प्राण्यावर हल्ला करण्याची दुसरी घटना घडली असून शेतकरी व नागरिकामध्ये बिबट्याची मोठ्या प्रमाणावर दहशत पसरली आहे. लोकप्रतिनिधी व सरकारी यंत्रणेने याची दखल घेऊन लवकरात लवकर बिबट्याचा काहीतरी बंदोबस्त करण्यात यावा, अशी मागणी गावकरी व वर्गातून होत आहे. या घटनेबाबत वनखात्याला कळविले असून वनखात्याचे पथक घटनास्थळी थोडया वेळात पोहचत असल्याची माहिती वनरक्षक सचीन कांबळे यांनी दिली .