मंगळवेढा(सोलापूर): जिल्ह्यात कोरोनाची वाढती आकडेवारी पाहता शहरात नगरपरिषदेकडून थर्मल स्क्रिनिंगनंतर आता ऑक्‍सिमीटर व ग्लुकोमीटर तपासणी केली जात आहे. साथरोग सर्वेक्षणातून ताप, सर्दी, खोकला, घसा खवखवणे, श्‍वसनास त्रास, धाप लागणे, शुगर, रक्‍तातील ऑक्‍सिजनचे प्रमाण आदी लक्षणे असलेल्या नागरिकांचा शोध घेतला जात असल्याची माहिती मुख्याधिकारी पल्लवी पाटील यांनी दिली. 

हेही वाचाः या अधिकाऱ्याच्या घरी 11 लाखांची जबरी चोरी 

एक महिन्यापूर्वी थर्मल स्क्रिनिंगद्वारे सर्व नागरिकांची तपासणी करण्यात आली. अन्य गावातून येणाऱ्या नागरिकांचे प्रमाण वाढल्याने प्रतिबंधात्मक उपायकरिता सर्वेक्षण करण्यात येत आहे. त्यानुसार शहरात पुन्हा एकदा ग्लुकोमीटरद्वारे रक्तातील साखर व ऑक्‍सिमीटरद्वारे ऑक्‍सिजनचे प्रमाण तपासणीचे काम युद्धपातळीवर सुरू केले. रेड झोनमधून आलेल्या नागरिकांना क्वारंटाइन करणे व शहरातील नागरिकांच्या आरोग्याची तपासणी करण्यावर भर देत आहे. 

हेही वाचाः गुड न्युजः अक्कलकोट झाले कोरोनामुक्त 

शहरात नगरपालिका कर्मचारी, शिक्षण मंडळाच्या शिक्षिका तसेच अंगणवाडी सेविकांच्या मदतीने सर्वेक्षण सुरू आहे. थर्मल स्क्रिनिंगद्वारे तापमान तपासणी करून जास्त तापमानाची नोंद झालेल्या नागरिकांना ग्रामीण रुग्णालयात पुढील तपासणीसाठी पाठवण्यात येते. 
आता रक्तातील साखरेचे व ऑक्‍सिजनचे प्रमाण तपासण्याची विशेष मोहीम सुरू झाली आहे. यात ऑक्‍सिमीटरद्वारे रक्‍तातील ऑक्‍सिजनचे प्रमाण तपासण्याचे काम केले जाते. कोरोना आजारात श्‍वसनास त्रास झाल्यास ऑक्‍सिजनच्या प्रमाणातील बदल तपासणीत स्पष्ट होतो. 50 ते 55 वर्षांच्या नागरिकांची जागेवरच मधुमेह तपासणी करण्यात येत असल्याचे मुख्याधिकारी पाटील यांनी सांगितले. 

नागरिकांनी स्वतःची काळजी घ्यावी 
शासनाने काही प्रमाणात उद्योग, व्यापार व व्यवसाय सुरू करण्यास परवानगी दिली आहे. नागरिकांनी सुरक्षित अंतर ठेवणे, मास्क वापरणे, सतत हात धुणे अशा सवयी लावून घ्याव्यात. अन्य ठिकाणांवरून आलेल्या नागरिकांची माहिती द्यावी. . 
-अरुणा माळी, नगराध्यक्षा, मंगळवेढा