सांगोला (सोलापूर) : सांगोला शहर व तालुक्‍यात वाढत चाललेली कोरोनाची साखळी तोडण्यासाठी 15 ते 24 सप्टेंबर दरम्यान जनता कर्फ्यूचे आवाहन करण्यात आले. या आवाहनाला सांगोला व ग्रामीण भागातील व्यापारी, नागरिकांकडून चांगला प्रतिसाद मिळाला आहे. गुरुवारी (ता. 17) तिसऱ्या दिवशीही व्यापाऱ्यांनी आपली दुकाने शंभर टक्के कडकडीत बंद ठेवून जनता कर्फ्यूत सहभाग नोंदवला आहे. 

हेही वाचा : सोलापूरच्या ग्रामीण भागात 557 नवीन कोरोनाबाधित 

कोरोनाचा वाढता प्रादुर्भाव कमी करण्यासाठी सर्वपक्षीय बैठकीत 15 ते 24 सप्टेंबर दरम्यान पूर्णपणे लॉकडाउन करण्याचा निर्णय घेण्यात आला. शहरासह ग्रामीण भागात पुकारण्यात आलेल्या जनता कर्फ्यूला व्यापारी व जनतेने उत्स्फूर्त प्रतिसाद दिला आहे. मेडिकल व दवाखाने वगळता सर्व दुकाने बंद ठेवण्यात आल्याने शहरातील रस्त्यांवर शुकशुकाट पाहायला मिळाला. व्यापारी संघटनांनी सुद्धा नागरिकांना यात सहभागी होत प्रतिसाद देण्यास सांगितले. 

हेही वाचा : सकल मराठा समाज आंदोलन : सोमवारी "येथील' प्रत्येक घरावर फडकणार भगवा ध्वज 

सोशल मीडियावरूनही जनजागृती करून कोरोना व्हायरसचा वाढता प्रादुर्भाव रोखण्यासाठी सर्वत्र उपाययोजना केली जात आहे. जनता कर्फ्यूदरम्यान शहरातील चौका - चौकांत पोलिस बंदोबस्त दिसून येत आहे. विशेष म्हणजे, शहरात कडकडीत बंद पाळण्यात आला असतानाच रस्त्यावर दिसणाऱ्यांची पोलिसांकडून विचारपूस केली जात होती. तसेच मास्क न वापरलेल्या लोकांना तोंडावर रुमाल बांधा व लवकरात लवकर घरी जाण्याबाबत समजावून सांगितले जात होते. तसेच विनाकारण रस्त्यावर फिरणाऱ्यांवर कारवाई देखील करण्यात येत आहे. 

याबाबत सांगोला पोलिस ठाण्याचे पोलिस निरीक्षक राजेश गवळी म्हणाले, कोरोनाचा वाढता प्रादुर्भाव लक्षात घेता नागरिकांनी विनाकारण घराबाहेर पडू नये. कोरोनाची साखळी तोडण्यासाठी सध्या तालुक्‍यात जनता कर्फ्यू लागू करण्यात आल्यामुळे विनाकारण, बिगर मास्क बाहेर फिरणाऱ्या नागरिकांवर कारवाई करण्यात येईल. 

संपादन : श्रीनिवास दुध्याल