परंडा : भैरवनाथ साखर कारखाना ऊस दराबाबतची खुशखबर पुढच्या आठवड्यात देणार आहे. उस्मानाबाद जिल्ह्याचे पालकमंत्री प्रा. डॉ. तानाजी सावंत याबाबत पत्रकार परिषद घेणार असल्याची माहिती कारखान्याचे चेअरमन प्रा. शिवाजीराव सावंत यांनी दिली. रविवारी (ता. ३०) भैरवनाथ साखर कारखान्यांच्या १५ व्या गळीत हंगामाचा शुभारंभ प्रा. शिवाजीराव सावंत यांच्या हस्ते गव्हाणीत उसाची मोळी टाकून करण्यात आला.

यावेळी जिल्हा परिषदेचे माजी उपाध्यक्ष धनंजय सावंत, माजी सभापती दत्ता साळुंके पृथ्वीराज सावंत, विक्रम सावंत, पोलिस अधिकारी आशिष खांडेकर, गजेंद्र सूर्यवंशी, राहुल डोके आदी उपस्थित होते. शेतकऱ्यांशी संवाद साधताना चेअरमन प्रा. सावंत म्हणाले की, भैरवनाथ साखर कारखान्याच्या उभारणीनंतर या भागाचा विकास सुरू झाला आहे.

हा भाग वैभव संपन्न होत आहे. कारखाना प्रपंचाच्या कुटुबांच्या हिताच्या गोष्टी करण्याचे ठिकाण आहे. त्यामुळे राजकारणावर बोलणार नाही असे सांगून कारखान्यावर टीका करणारे कारखान्याच्या जीवावर मोठे झाल्याचे सांगायला चेअरमन प्रा सावंत विसरले नाहीत.

यापूर्वी दोन हजार ४०० रुपयाचा भाव साखर कारखान्याने दिला आहे. रिकव्हरी पेक्षा जास्त भाव देणे संयुक्तीक नाही असे सांगून पुढच्या आठवड्यात उस उत्पादक शेतकरी वर्गाला खुश करणार आहे. कारखान्याला चांगला ऊस उत्पादक शेतकऱ्यांनी द्यावा. कुणाचाही ऊस शिल्लक राहणार नाही. असे चेअरमन पा. सावंत यांनी सांगितले कार्यक्रमासाठी उस उत्पादक शेतकरी मोठ्या संख्येने उपस्थित होते. सुभाष भोसले यांनी सूत्रसंचालन करून आभार मानले.