पंढरपूर (सोलापूर) : कोरोनाबरोबरच आता डेंगी, हिवताप, मलेरिया यासारख्या पावसाळ्यातील साथीच्या आजारांचा प्रतिबंध करण्यासाठी नगरपालिकेचा आरोग्य विभाग सतर्क झाला आहे. त्यादृष्टीने नगरपालिकेतर्फे शहर व उपनगरात उपाययोजना सुरू केल्या आहेत. याचाच एक भाग म्हणून शहरात विविध भागात गप्पी माशांची 25 पैदास केंद्रे तयार करण्यात आली आहेत, अशी माहिती नगरपालिकेच्या आरोग्य समितीचे सभापती विवेक परदेशी यांनी आज "सकाळ'शी बोलताना दिली. 

नगरपालिकेतर्फे कंटेनर सर्वेक्षण 
डेंगी व मलेरिया यासारख्या जीवघेण्या आजाराची साथ पसरू नये यासाठी नगरपालिकेच्या वतीने नागरिकांचे समुपदेशन करून त्यांना साथीच्या आजाराबाबत माहिती देण्याचा उपक्रम सुरू केला आहे. दोन दिवसांपूर्वीच नगरपालिकेतर्फे कंटेनर सर्वेक्षण करण्यात आले. सर्वेक्षणादरम्यान स्वच्छता राखण्याचे आवाहन शहरातील सर्व नागरिकांना केले आहे. 

हेही वाचा : राज्यातील डीएड शिक्षकांवर होणार अन्याय...का ते वाचा... 

गप्पी माशांची 25 पैदास केंद्रे 
पावसाळ्यात डासांची उत्पत्ती मोठ्या प्रमाणावर होते. त्यातून डेंगी, मलेरिया, हिवताप यासारखे साथीचे आजार होतात. साथीचे आजार पसरवणाऱ्या डासांची उत्पत्ती रोखण्यासाठी गप्पी माशांचा प्रभावीपणे वापर केला जातो. जास्ती गप्पी माशांची पैदास करण्यासाठी नगरपालिकेने विविध भागांत गप्पी माशांची 25 पैदास केंद्रे तयार केली आहेत. यामध्ये लाखो गप्पी माशांची पैदास केली जात आहे. हे गप्पी मासे शहरातील नागरिकांना देण्यात येणार आहेत. 

हेही वाचा :   सोलापूर जिल्ह्याच्या ग्रामीण भागात कोरोना बाधितांची शंभरी

शहरातील काही भागांत पाहाणी 
दोन दिवसांपूर्वीच नगराध्यक्षा साधना भोसले, मुख्याधिकारी अनिकेत मानोरकर यांनी शहरातील काही भागांत फिरून पाहाणी केली. यावेळी सांडपाण्याच्या ठिकाणी अळ्या आढळून आल्या. त्या ठिकाणी तत्काळ टेमीफॉस या अळीनाशक द्रावणाची फवारणी करण्यात आली. साथ प्रतिबंधात्मक उपाययोजना करण्यासाठी पालिकेचे जीवशास्त्रज्ञ किरण मंजुळ यांच्या मार्गदर्शनाखाली 30 हंगामी कर्मचाऱ्यांमार्फत डासोत्पत्ती स्थानांवर बॅक्‍टीसाइड पावडर व टेमीफॉस औषधांची फवारणी सुरू केली आहे. 

60 जणांची मलेरिया टेस्ट निगेटिव्ह 
मलेरिया साथ नियंत्रणात ठेवण्यासाठी नगरपालिकेच्या वतीने रक्त नमुने घेतले जात आहेत. आतापर्यंत सुमारे 60 हून अधिक संशयित रुग्णांचे नमुने तपासणीसाठी घेण्यात आले आहेत. यामध्ये सर्व रुग्णांची टेस्ट मलेरिया निगेटिव्ह आली आहे. 
- किरण मंजुळ, जीवशास्त्र 

नोटीस देण्याबाबत सूचना 
शहरातील ज्या मिळकतदारांनी अजूनही घरातील सांडपाण्याचे पाइप भुयारी गटारास जोडले नाहीत. त्या घर मालकांना नोटीस देण्याबाबत सूचना दिल्या आहेत. 
- विवेक परदेशी, 
सभापती, आरोग्य समिती 

             नागरिकांनी घ्यावयाची काळजी 

•  घराशेजारी टायर व प्लास्टिक वस्तू ठेवू नयेत 
•  घराच्या गच्चीवर व अंगणात असलेल्या कुंड्या, मडक्‍यांमध्ये पाणी साठणार नाही याची काळजी घ्यावी. 
•  घरातील व हॉटेलमधील पाण्याच्या हौदात गप्पी मासे सोडावेत. 
•  फ्रीजच्या पाठीमागील बॉक्‍समध्ये पाणी साठणार नाही याची दक्षता घ्यावी. 
•  घरात व परिसरात स्वच्छता राखावी.