सोलापूर: राज्य शासनाचा मद्य विक्रीचा मुद्दा गाजत असताना, मद्याच्या वाईट परिणामांपासून लोकांना दूर ठेवण्यासाठी अल्कोहोलिक्‍स ऍनानिमस (एए) या आंतरराष्ट्रीय व्यसनमुक्ती संघटनेने देखील पुढाकार घेत ऑनलाइन व्यसनमुक्ती चळवळ सुरू केली आहे. एकूण 200 ऑनलाइन व्यसनमुक्ती सभांना मोठा प्रतिसाद मिळतो आहे. 

हेही वाचा: महावितरणने उद्योजकांशी साधला संवाद 

लॉकडाउनमध्ये मद्य विक्रीचा मुद्दा चांगलाच गाजला होता. मद्य विक्रीतून मोठ्या प्रमाणात कर मिळतो म्हणून मद्य विक्रीला सुरवात झाली. त्यानंतर ऑनलाइन मद्य विक्री करण्याबाबत देखील तयारी झाली होती. मध्यंतरीच्या काळात लॉकडाउनमुळे मद्य विक्री बंद होती. या काळात व्यसनाच्या आहारी गेलेल्या काही मद्यपींच्या बाबतीत अनेक प्रकारच्या घटना घडल्या. त्यांच्यासाठी राज्य सरकारने एक हेल्पलाइन सुरू केली आहे. 

हेही वाचा: ऑनलाइन सहजयोग ध्यान वरदानच 

मुळातच मद्यपींनी व्यसनातून मुक्त व्हावे यासाठी अल्कोहोलिक्‍स ऍनानिमस (एए) या जागतिक संघटनेने देखील ऑनलाइन मार्गदर्शन उपलब्ध केले आहे. या संघटनेच्या वतीने प्रत्येक जिल्ह्यात व्यसन सोडण्याची इच्छा असणाऱ्या व्यक्तींसाठी विविध बैठकांचे आयोजन नियमितपणे करण्यात येते. सोलापुरात देखील अशा प्रकारच्या बैठका होत असतात. मात्र कोरोना संकटात कोणत्याच बैठका घेणे शक्‍य नाही. पण मद्यपींना व्यसनमुक्तीचे मार्गदर्शन होणे गरजेचे आहे, त्या दृष्टीने संघटनेने प्रत्येक राज्यामध्ये ऑनलाइन मार्गदर्शन उपलब्ध करून दिले आहे. देशभरात अशा प्रकारच्या 200 ऑनलाइन सभा आयोजित केल्या जात आहेत. पूर्वी या कामात ज्यांना मद्याचे व्यसन थांबवण्याची इच्छा आहे, त्यांना सहभागी होता येत असे. मात्र, लॉकडाउनच्या काळात अनेक मद्यपींना मद्य न मिळाल्याने त्यांचे व्यसन थांबले आहे. त्यांच्यासाठी पुढील काळात देखील मद्यापासून दूर राहता यावे यासाठी देखील या ऑनलाइन सभेमध्ये मार्गदर्शन केले जात आहे. सोलापुरातील मद्यपींसाठी देखील मोबाईल क्रमांक 9922828499 व 9604023847 वर ऑनलाइन सभेच्या सूचना उपलब्ध करण्यात आल्या आहेत.