सोलापूरः विजया दशमीचे औचित्य साधून येथील निसर्गप्रेमी अजित चौहान व त्यांच्या कुटूंबियांनी येथील स्मृती वनामध्ये आपट्याच्या झाडांची 45 रोपे भेट स्वरुपात वाटप केली. 

हेही वाचाः मोबाईलचे कव्हर तयार करणाऱ्या प्रतीक्षा थोरात 

दरवर्षी आपण आपट्याची पाने सोनं म्हणून एकमेकांना वाटून शुभेच्छा देतो ही परंपरा आहे. परंतु दुसऱ्या दिवशी त्याचे कचऱ्यामध्ये रुपांतर होते. काहीजण तर अक्षरशः त्या आपट्याच्या पानांना जाळून टाकतात. म्हणजे त्या पानांनी शोषलेला Co2 परत वातावरणात मिसळतो. ही झाडे जर आपण तोडली नसती तर पक्ष्यांनी या झाडावर घरटी बांधून नविन पिढी वाढवली असती. एक झाड म्हणजे जैवविविधतेचे भांडार असते. त्यावर अनेक किटक, फुलपाखरे, पक्षी, प्राणी व मनुष्य यांचे जीवन अवलंबून असते. पण दरवर्षी दुर्दैवाने आपण जुन्या रीती सांभाळत आपटा, कांचनार आणि अंजन या झाडांची हत्या करतो.हे कुठे तरी थांबायलाच पाहिजे.दरवर्षी आपण ही चूक करतो. 
याच अनुषंगाने आज निसर्ग मित्र अजित चौहान यांनी त्यांच्या सुविद्य पत्नी संयुक्ता चौहान यांच्या 45 व्या वाढदिवसानिमित्त 45 आपटयांच्या झाडांची रोपे निसर्गप्रेमींना भेट स्वरूपात देऊन एक आगळा-वेगळा दसरा साजरा केला. 

हेही वाचाः सोलापूरच्या ग्रामीण भागात 107 नविन कोरोनाबाधित रुग्ण 

सोलापूरातील निसर्गरम्य अशा स्मृती वनांमध्ये हा कार्यक्रम निसर्गप्रेमींच्या उपस्थितीत संपन्न झाला. यावेळी बोलताना वनक्षेत्रपाल सामाजिक वनीकरण श्री. टी. व्ही. जाधवर साहेब म्हणाले की, आज आपल्याकडे वृक्ष संवर्धनाबाबत लोकांमध्ये चांगली जनजागृती झाली आहे. पण यासोबतच एखादे वृक्ष जर कोणी तोडत असेल तर त्याची कल्पना वनविभागाला देणे किंवा ते वृक्ष तोडण्यापासून त्यांना परावृत्त करुन त्यांचे संरक्षण करणे ही काळाची गरज असल्याचे त्यांनी यावेळेस नमूद केले. या वेळेस उपस्थित निसर्गप्रेमींना प्रत्येकी आपट्याचे रोप देऊन त्यांचा सत्कार करण्यात आला. या कार्यक्रमास निसर्गप्रेमी संतोषभाऊ धाकपाडे, पंकज चिंदरकर, सुरेश क्षिरसागर, महादेव डोंगरे, विनय गोटे, अजय हिरेमठ, किरण माने, सिद्धांत चौहान, रुद्रप्रताप चौहान उपस्थित होते.