सांगोला (सोलापूर): पोलिसांनी कोळा ते शेटफळे रोडवरील देशमुख वस्ती जवळील ओढ्यात विनापरवाना वाळू उपसा करणाऱ्या वाळू माफियांवर कारवाई करत 9 जणांना ताब्यात घेतले. या कारवाईत पोलिसांनी तीन जेसीबी, सहा ट्रॅक्‍टर, सहा ब्रास वाळू असा एक कोटी 2 लाख 24 हजार रुपयांचा मुद्देमाल जप्त केला.

पोलिस निरीक्षक सुहास जगताप यांच्या आदेशानुसार पोलिस गस्त सुरू असताना कोळा ते शेटफळे रोडवरील देशमुख वस्तीजवळील किशोर तोडकरी यांच्या शेतातील ओढ्यात वाळू माफिया जेसीबीच्या सहाय्याने विनापरवाना वाळू उपसा करत असल्याची माहिती मिळाली. त्या आधारे पोलिसांनी छापा टाकला असता तीन जेसीबी व सहा ट्रॅक्‍टरच्या वाळू उपसा सुरू असल्याचे दिसून आले.

या कारवाईत पोलिसांनी मच्छिंद्र ज्ञानू सांगोलकर (रा. तिप्पेहाळी), सुनील राम जाधव (रा. फुलवाडी, ता. तुळजापूर), बबन मनोहर राठोड (रा. मुस्ती, ता. द.सोलापूर), सचिन मारुती गडदे (रा. गौडवाडी), महादेव तानाजी देशमुख, मल्हारी भीमराव मोहिते, लक्ष्मण तानाजी माने, जगन्नाथ नामदेव सरगर, अक्षय नारायण सरगर (सर्व रा. कोळा) यांना ताब्यात घेतले. एम.एच.45 ए.डी. 8427, एम.एच.45 ए.डी.8428, एम.एच.45 ए.एल.3043 असे प्रत्येकी 20 लाख रुपये किमतीचे एकूण 60 लाखांचे तीन जेसीबी, एम.एच. 45 एस 3633, एम.एच.45 एस. 2858, एम.एच. 45 ए.एल. 0916, एम.एच.45 एफ 7213, एम.एच.45 एफ 8274, एम.एच. 10 ए.यु.1852 असे प्रत्येकी 7 लाख रुपये किमतीचे 42 लाखांचे सहा ट्रॅक्‍टर, 24 हजार रुपयांची सहा ब्रास वाळू असा एक कोटी 2 लाख 24 हजार रुपयांचा मुद्देमाल जप्त केला. याप्रकरणी सिध्दनाथ शिंदे यांनी वरील सहा जणांविरुद्ध सांगोला पोलिसांत फिर्याद दिली आहे.