करमाळा (सोलापूर) : करमाळा तालुक्‍यात आज एका 55 वर्षीय व्यक्तीचा कोरोनामुळे मृत्यू झाला आहे. तर नवे तीन कोरोना पॉझिटिव्ह रुग्ण सापडले आहेत. नवीन पॉझिटिव्ह सर्व तिन्ही रुग्ण पुरुष असून, करमाळा शहरातील आहेत. आतापर्यंत एकूण 25 जणांना कोरोनाची लागण झाली आहे. 

हेही वाचा : मोठी बातमी! "थकहमी'साठी कारखानदारांनी ठोठावला सरकारचा दरवाजा; राज्य बॅंकेचे आठ हजार कोटी थकले 

करमाळा शहर व तालुक्‍यात कोरोनाची संख्या झपाट्याने वाढू लागल्याने नागरिकांमध्ये भीतीचे वातावरण निर्माण झाले आहे. तर नागरिकांनी गर्दी टाळावे, असे आवाहन तहसीलदार समीर माने यांनी केले आहे. कोरोनामुळे मृत्यू झालेली व्यक्ती महसूल विभागात मंडल अधिकारी म्हणून कार्यरत होती. त्यामुळे करमाळा तहसील कार्यालयातील सर्व कर्मचाऱ्यांची व तलाठी यांची कोरोना चाचणी करण्यात आली आहे. 

हेही वाचा : उजनी धरणाची सुरू झाली "प्लस'कडे वाटचाल 

याबाबत अधिक माहिती देताना तहसीलदार समीर माने यांनी सांगितले की, करमाळा शहर व तालुक्‍यातील 101 जणांची तपासणी अँटिजेन रॅपिड टेस्टिंग किटद्वारे करण्यात आली. यातील 25 जणांचे अहवाल पॉझिटिव्ह आले आहेत. त्यातील करमाळा शहरातील एका व्यक्तीचा बार्शी शहरात उपचार घेत असताना कोरोना संसर्ग व पूर्वीचे मधुमेह, उच्च रक्तदाब या आजारांमुळे शनिवारी (ता. 18) पहाटे मृत्यू झाला आहे. 

अलीकडील काळात रूग्णांची संख्या वाढत असली तरी लोकांनी स्वयंशिस्त पाळावी. रॅपिड अँटिजेन टेस्टची संख्या तालुक्‍यात वाढविण्यात येणार आहे. प्रशासनाच्या सूचनांची अंमलबजावणी करावी. मास्क, सॅनिटायझरचा वापर करावा. करमाळा शहरातील मेनरोड, वेताळ पेठ, सुमंत नगर, मंगळवार पेठ, सिद्धार्थनगर भाग सील करण्यात आले आहेत. 

संपादन : श्रीनिवास दुध्याल