सोलापूर : पालघर (Palghar) जिल्ह्यातील खुपरी (ता. वाडा) येथील साई ओम पेट्रो स्पेसिलिटीज लिमिटेड या कंपनीला रिसायकल व्यवसायाचा परवाना असताना, त्यांनी केमिकलच्या साह्याने डिझेल तयार करून त्याची विक्री केली. या कंपनीने बेकायदेशीर डिझेल (Illegal diesel) बनवण्यासाठी कोणकोणते केमिकल कोठून आणले? याचा तपास सुरू असल्याची माहिती सोलापूरच्या पोलिसांनी (Police) दिली. या प्रकरणात एकूण 17 कोटी 20 लाख 90 हजार रुपयांचा मुद्देमाल जप्त करण्यात आला आहे.

हैदराबाद- पुणे राष्ट्रीय महामार्गालगत हॉटेल समर्थच्या आकांक्षा लॉजिस्टिकच्या खासगी बसमध्ये डिझेलसदृश ज्वलनशील पदार्थ टाकत असल्याची माहिती पोलिसांना मिळाली होती. त्या ठिकाणी छापा टाकून पोलिसांनी कारवाई करत तानाजी कालिदास ताटे (रा. मानेगाव, ता. बार्शी, जि. सोलापूर), युवराज प्रकाश पडवळकर (रा. पंचशीलनगर, वैराग, ता. बार्शी), अविनाश सदाशिव गंजे (रा. भवानी पेठ, चडचणकर अपार्टमेंट, सोलापूर), सुधाकर सदाशिव गंजे (रा. अवंतीनगर, पूना नका, सोलापूर), श्रीनिवास लक्ष्मण चव्हाण (अभिषेक नगर, सोलापूर), हाजू लतीफ शेख (रा. कौडगाव, ता. जि. उस्मानाबाद) यांना ताब्यात घेऊन घटनास्थळावरून एक टॅंकर डिझेल व आकांक्षा लॉजिस्टिकच्या तीन बस जप्त केल्या होत्या.

गुन्ह्याच्या तपासादरम्यान हिमांशू संजय भूमकर (वय 21, रा. भूमकर कॉलनी, बार्शी रोड, वैराग) यांनी डिझेलसारखा ज्वलनशील पदार्थ टॅंकर क्रमांक एम. एच. 25 एके 2417 मध्ये पाठविल्याचे निष्पन्न झाले. त्यांना अटक केल्यानंतर डिझेलसारखा ज्वलनशील द्रव कोठून आणला? याबाबत त्यांच्याकडे तपास करण्यात आला. हा पदार्थ द्रवपदार्थ पालघर जिल्ह्यातील वाडा तालुक्‍यातील खुपरी येथील साई ओम पेट्रो स्पेसिलीटीज कंपनीतून आणला असल्याचे त्यांनी सांगितले. त्यानुसार सोलापुरातील गुन्हे शाखेची दोन पथके पालघरकडे रवाना झाली होती. त्या कंपनीत वेगवेगळ्या रासायनिक नवनिर्मितीच्या मशिनरी व भेसळ करण्यासाठी यंत्रसामग्री असल्याचे समोर आले. कंपनीची मशिनरी मालमत्तेसह 16 कोटी 19 लाख 90 हजार रुपयांचा मुद्देमाल पोलिसांनी जप्त केला आहे.