वैराग (सोलापूर) : अनेकांना अडचणीच्या काळात मदतीचा हात देणारे ग्रामीण पत्रकारही आता कोरोनाच्या अडचणीत सापडलेत. वैराग (ता. बार्शी) येथील एका ज्येष्ठ ग्रामीण पत्रकाराला अस्वस्थ वाटू लागल्याने प्राथमिक आरोग्य केंद्रात उपचारासाठी दाखल केले असता, पुढील उपचारासाठी त्यांना वैद्यकीय अधिकाऱ्यांनी बार्शी येथे पाठविण्याचा सल्ला दिला. पण तब्बल तीन तासांनी 108 रुग्णवाहिका मिळाल्याने रुग्णास मानसिक त्रास सहन करावा लागला. याबरोबरच आरोग्यसेवेची होणारी हेळसांड पुन्हा एकदा उघड झाली आहे. 

हेही वाचा : सासरच्या त्रासाला कंटाळून जैनवाडीत विवाहितेची आत्महत्या 

याबाबत सविस्तर वृत्त असे, की मंगळवारी (ता. 11) वैरागच्या एका ज्येष्ठ पत्रकाराला दुपारी बाराच्या सुमारास प्रकृती अस्वस्थ वाटत असल्यामुळे तपासणीसाठी वैराग प्राथमिक आरोग्य केंद्र येथे नेण्यात आले. त्यांची कोरोनाची रॅपिड टेस्ट ही निगेटिव्ह आली. परंतु त्यांच्यामध्ये कोरोनाची लक्षणे, खोकला, सर्दी, ताप, चव न येणे, ऑक्‍सिजन कमी अशी लक्षणे दिसत होती. त्यामुळे त्यांना पुढील उपचारासाठी व तपासणीसाठी वैराग येथील आरोग्य अधिकाऱ्यांनी बार्शी येथील जगदाळे मामा हॉस्पिटल येथे उपचारासाठी जाण्याचा सल्ला दिला. 
रुग्णाला पाठवण्याकरिता आरोग्य सेवकाने 108 रुग्णवाहिकेशी संपर्क केला असता, त्याला सांगण्यात आले, की वैरागची 108 रुग्णवाहिका ही इतर कॉलवर आहे. आपणास लवकरच दुसरी रुग्णवाहिका उपलब्ध करून देण्यात येईल. परंतु, तसे काही झाले नाही. शेवटी तब्बल तीन तासांनी वैराग येथीलच 108 रुग्णवाहिका आली व नंतर रुग्णास बार्शी येथे दाखल करण्यात आले. सध्या त्यांच्यावर उपचार सुरू आहेत. 

हेही वाचा : पंढरपुरात सहाय्यक पोलिस निरीक्षकाचा अपघाती मृत्यू 

घडलेल्या प्रकारासंदर्भात वैराग येथील रुग्णवाहिकेच्या चालकास, एवढा वेळ रुग्णवाहिका का मिळाली नाही, अशी विचारणा केली असता त्याने सांगितले, की वैरागचा कॉल आला होता. त्या अगोदरचा कॉल मुंगशी (आर) व भालगाव येथील सात रुग्ण बार्शी येथे घेऊन जात होतो. त्यांना सोडले की मी लगेच या कॉलसाठी आलो व रुग्णाला शिफ्ट केलाय. दुसरी रुग्णवाहिका का मिळाली नाही? हे मात्र त्याला माहीत नव्हते. तुम्हाला जर अधिक माहिती किंवा काही स्पष्टीकरण हवे असल्यास वरिष्ठ अधिकाऱ्यांना संपर्क करा, असे सांगितले व पुढे बोलणे टाळले. 

वैराग येथील वैद्यकीय अधिकाऱ्यांना पत्रकारांनी याबाबत विचारले असता, रुग्णवाहिका उपलब्ध करण्यासाठी आम्ही प्रयत्न केले. परंतु 108 डिव्हिजन हे आमच्याकडे येत नाही. तरी पण मी रुग्णवाहिका उपलब्ध होईपर्यंत रुग्णाची काळजी घेत तेथेच थांबलो व रुग्णाला पाठवून दिले, अशी माहिती त्यांनी दिली. 

संपादन : श्रीनिवास दुध्याल