सोलापूर : चिमणीचे आधीच स्थलांतर न करता निवडणुका डोळ्यासमोर ठेवून शेतकऱ्यांची दिशाभूल केली जात आहे. आपण साखर कारखाना कसा वेळेत सुरु करता येईल यासाठी प्रयत्न करू असे मत शेतकरी संघटनेचे नेते सदाभाऊ खोत (Sadabhau Khot) यांनी येथे व्यक्त केले.

येथील सोलापूर विकास मंचाच्या बैठकीत ते बोलत होते. ते पुढे म्हणाले, सोलापूरची चादर, विडी उद्योग जगभर प्रसिद्ध लाखो कामगार काम करीत आहेत. याही उद्योगाला चालना दिली पाहिजे. माझा पिंड शेतकरी चळवळीतला आहे.

विमानसेवेमुळे शहराचा विकास होत असेल,तरुणांच्या हाताला रोजगार मिळत असेल तर उत्तमच आहे. साखर कारखान्याच्या चेअरमनच्या आडमुठीपणामुळे शेतकऱ्यांचे मोठे नुकसान होत आहे. तेव्हाच चिमणीचे स्थलांतर झाले असते तर ही वेळ आली नसती.

चिमणी गेली मालकाला काय फरक पडत नाही. उलट शेतकऱ्यांची दिशाभूल करून खोटी सहानुभूती दाखवून लोकसभा, विधानसभा निवडणुकीत मोठ्या फरकाने निवडून येण्याची तयारी करत आहेत असा टोला त्यांनी लगावला.

साखर संचालकाकडून माहिती घेऊन कारखाना कशाप्रकारे सुरु करता येईल, याबाबत प्रयत्न करणार आहे असे त्यांनी सांगितले. तरुणांच्या हातात रोजगार असेल तर जगाची बाजारपेठ काबीज करता येते. सोलापूर विकास मंचच्या या लढ्यासोबत असून शहराच्या विकासासाठी शासनाकडे पाठपुरावा करू असे आश्वासन त्यांनी शेवटी दिले.