सोलापूरः लॉकडाउनच्या सुट्यांमध्ये बाळे गावाच्या परिसरातील शालेय विद्यार्थ्यांनी पक्षी निरीक्षण व छायाचित्रणाची कला अवगत करत पक्ष्यांची सुंदर छायाचित्रे काढली आहेत. या परिसरातील पक्षी वास्तव्याचा अभ्यास या विद्यार्थ्यांनी केला. 

हेही वाचाः जिल्ह्यात दमदार पावसाची हजेरी 

लॉकडाउनमुळे पहिले काही दिवस रिकाम्या वेळेत नेमके काय करायचे, या विचाराने निसर्गमित्र संतोष धाकपाडे अस्वस्थ होते. त्यांचा घराचा परिसर वृक्षसंपन्न आहे. उंबर, पिंपळ, चिंच, लिंब आणि सप्तपर्णीसारखे विविध वृक्ष घराच्या आजूबाजूला आहेत. एके दिवशी "ची ची ची' करीत एक पक्ष्यांचा समूह पिंपळाच्या झाडावर आला. तो चष्मेवाला नावाने ओळखला जाणाऱ्या पक्ष्यांचा थवा होता. चष्मेवाला पक्षी हा चिमणीपेक्षा थोडा लहान असतो. डोक्‍यापासून पंखापर्यंत शरीर पिवळ्या रंगाचे असते, शेपटी थोडी फिकट तपकिरी रंगाची असते, पोटाखालचा भाग पांढरा असतो, पाय काळ्या रंगाचे असतात. तेव्हा त्यांनी राकेश धाकपाडे, समर्थ धाकपाडे, सूरज धाकपाडे व आदित्य बनसोडे या शाळकरी मुलांना पक्षी निरीक्षण कसे करायचे, हे शिकवले. पक्ष्यांची छायाचित्रे कशी काढायची, याचे मार्गदर्शन केले. अक्षरशः ही मुले छान निरीक्षणाबरोबर उत्कृष्ट छायाचित्रेदेखील काढू लागली. ऑनलाइन अभ्यास आटोपून उरलेल्या वेळेत मुले अशा प्रकारची छायाचित्रे काढत होती. 

हेही वाचाः सोलापूर जिल्हा कॉंग्रेसच्या कार्याध्यक्षपदी सुरेश हसापुरे 

चष्मेवाला, चिमणी, सूर्यपक्षी, चिरक, बुलबुल, तांबट, कोकिळा, होला, पारवा, कवडी रामगंगा, शिंपी, सुभग, पोपट, साळुंकी, भांगपाडी मैना, शिक्रा, हळद्या, कावळा, घार या पक्ष्यांची छायाचित्रे काढली. विशेष आकर्षण म्हणजे, काळ्या डोक्‍याचे खाटीक पक्षी देखील या लॉकडाउनमुळे घराच्या आजूबाजूच्या परिसरात दिसून आले. एवढे विविध प्रकारचे पक्षी आपल्या परिसरात आढळतात, हे या लॉकडाउनमुळे कळले. या विद्यार्थ्यांनी आता पक्षी छायाचित्रणाचे कौशल्य शिकून घेतले. या विद्यार्थ्यांचा स्वतःचा एक छायाचित्र संग्रह तयार झाला आहे. 

छायाचित्रणात संयम महत्वाचा 
पक्षी निरीक्षण व छायाचित्रणासाठी आधी खूप संयमाने पक्ष्यांच्या हालचालीवर लक्ष ठेवावे लागते. पक्षी सामान्यपणे हालचाल करू लागले की त्यांना चाहूल न लागता कॅमेऱ्याद्वारे छायाचित्रे घेता येतात. 
- राकेश धाकपाडे, विद्यार्थी छायाचित्रकार