बार्शी - मुलगा आईकडे वारंवार पैशाची मागणी करीत असे. त्यातून अनेकवेळा तक्रारी झाल्या. पोलिस ठाण्यात गुन्हा दाखल केला, पण घरी कोणी नसल्याचा फायदा घेत दगड डोक्यात घालून आईचा खून केला व मृतदेह प्लास्टिक पिशवीमध्ये ठेवून पुरावा नष्ट करण्याचा प्रयत्न केल्याप्रकरणी मुलास बार्शी जिल्हा सत्र न्यायाधीश एल. एस. चव्हाण यांनी जन्मठेपेची शिक्षा सुनावली.

श्रीराम नागनाथ फावडे (रा. वाणी प्लॉट) असे शिक्षा झालेल्या तरुणाचे नाव आहे. रुक्मिणी नागनाथ फावडे असे खून झालेल्या महिलेचे नाव असून, पोलिस हवालदार अरुण माळी यांनी बार्शी शहर पोलिस ठाण्यात फिर्याद दाखल केली होती. ही घटना १२ ऑक्टोबर २०२१ रोजी घडली.

आईने खर्चासाठी पैसे दिले नाहीत, याचा राग मनात ठेवून मुगला श्रीरामने रात्रीच्या वेळी रुक्मिणी फावडे यांच्या डोक्यात दगड घालून खून केला.

गादीवर रक्त तसेच डोक्यात घातलेला दगड, डोक्यात रक्तस्राव झाल्याने मृत्यू झाल्याचा शवविच्छेदन अहवाल आदी साक्षी- पुरावे न्यायालयासमोर ठेवण्यात आले होते. तत्कालीन पोलिस निरीक्षक रामदास शेळके यांनी तपास करून न्यायालयात दोषारोपपत्र दाखल केले.

अभियोग पक्षातर्फे ११ साक्षीदार तपासण्यात आले. साक्षीदारांचा पुरावा व सरकार पक्षातर्फे राजश्री कदम यांचा युक्तिवाद ग्राह्य धरून न्यायालयाने आरोपी श्रीराम फावडे यास जन्मठेप व सात हजार रुपये दंडाची शिक्षा ठोठावली आहे. कोर्ट पैरवी म्हणून पोलिस हवालदार बाळासाहेब चौधरी यांनी काम पाहिले.