सोलापूर : राज्याच्या तुलनेत सोलापुरात कोरोनामुळे सर्वाधिक मृत्यू झाले असून, त्यामध्ये सर्वाधिक व्यक्‍ती कामगार वस्तीतील आहेत. या पार्श्‍वभूमीवर विडी, वस्त्रोद्योग, यंत्रमाग, हातमाग उद्योगातील व्यक्‍तींच्या छातीचा एक्‍स-रे केला जाणार आहे. त्यासाठी सोलापूर महापालिकेने पाच पोर्टेबल एक्‍स-रे मशिन मागविल्या आहेत. मात्र, ही टेस्ट करण्यापूर्वी भाभा अणुसंशोधन केंद्राकडून परवानगी घ्यावी लागणार असून, त्यासाठी महापालिका पत्र पाठविणार आहे. 

हेही वाचा : रविवारी जनता कर्फ्यू : कुठे? वाचा सविस्तर 

सोलापूर शहरात दोन हजार 326 कोरोनाबाधितांपैकी आतापर्यंत 255 व्यक्‍तींचा मृत्यू झाला आहे. मात्र, त्यापैकी 17 टक्‍के मृत्यू कोरोनामुळे झाले नसून उर्वरित 83 टक्‍के व्यक्‍तींना पूर्वीचे आजार होते. मधुमेह, उच्च रक्‍तदाब, हृदयरोग, किडनी, मेंदूसंबंधित आजार असल्याने अधिक व्यक्‍तींचा मृत्यू झाल्याचे आरोग्यमंत्री राजेश टोपे यांनी काही दिवसांपूर्वी स्पष्ट केले होते. या पार्श्‍वभूमीवर कामगार वस्तीतील विडी, हातमाग, यंत्रमाग उद्योगातील नागरिकांच्या छातीचा एक्‍स-रे काढण्याचेही निर्देश दिले. त्यानुसार आता महापालिकेने पाच एक्‍स-रे मशिन मागविल्या आहेत. मात्र, त्यामध्ये रेडिएशन असल्याने त्यासाठी भाभा अणुसंशोधन केंद्राची परवानगी घ्यावी लागणार आहे. 

हेही वाचा : कोरोनासोबत एकटा नव्हे तर कुटुंबीयांसह लढतोय डॉक्‍टर! 

महापालिकेने पाच पोर्टेबल एक्‍स-रे मशिन मागविल्या 
याबाबत महापालिकेचे उपायुक्त पंकज जावळे म्हणाले, सोलापूर शहरातील विडी, हातमाग, यंत्रमाग उद्योगातील कामगारांच्या छातीचा एक्‍स-रे काढले जाणार आहेत. त्यासाठी महापालिकेने पाच पोर्टेबल एक्‍स-रे मशिन मागविल्या आहेत. मात्र, त्यात रेडिएशन असल्याने भाभा अणुसंशोधन केंद्राची परवानगी घ्यावी लागणार असून त्यासाठी पत्र पाठविले जाणार आहे. परवानगी मिळाल्यानंतर एक्‍स-रे काढण्यास सुरवात केली जाणार आहे. 

ठळक बाबी... 

• सोलापूर शहरातील सुमारे दोन लाख कामगारांच्या छातीचा केला जाणार सर्व्हे 
• शहरातील एकूण मृत्यूपैकी 83 टक्‍के व्यक्‍तींचा मृत्यू कोरोनाव्यतिरिक्‍त अन्य आजारांमुळे 
• घरोघरी जाऊन महापालिकेने पुन्हा केले व्यक्‍तींचे थर्मल स्कॅनिंग 
• छातीच्या एक्‍स-रेसाठी महापालिकेने मागविल्या पाच पोर्टेबल एक्‍स-रे मशिन