सोलापूर : एसटीकडून ज्येष्ठ नागरिक, विद्यार्थी, स्वातंत्र्य सैनिक, दिव्यांग यांच्यासह एकूण २९ विविध घटकांना प्रवास भाड्यात ३३ ते शंभर टक्के सवलत देण्यात येते. या सवलतीचा लाभ घेण्यासाठी लाभार्थ्यांना स्मार्ट कार्ड काढणे बंधनकारक आहे. यासाठी लाभार्थ्यांना ऑनलाईन नोंदणी करावी लागत असल्याने तसेच नोंदणी पोर्टलचे सर्व्हर मागील आठ दिवसांपासून डाऊन असल्याने स्मार्ट कार्ड मिळण्यास उशीर होत आहे.

एसटीने स्मार्टकार्ड काढण्यासाठी अनेकदा मुदतवाढ दिली. आता ३१ जूनपर्यंत अंतिम मुदतवाढ दिली आहे. १ जुलैपासून एसटीने प्रवास करणाऱ्या लाभार्थ्यांना स्मार्टकार्ड बाळगणे आवश्यक आहे. मात्र स्मार्टकार्ड काढण्यास सर्व्हर डाऊनचा अडथळा निर्माण होत असल्याने स्मार्टकार्ड हे ३१ जूनपर्यंत पूर्ण होणार का असा प्रश्न उपस्थित होत आहे. १ जुलैपासून स्मार्टकार्ड नसणाऱ्या लाभार्थ्यांना पूर्ण प्रवास भाडे देऊन प्रवास करावा लागणार आहे.

त्यामुळे लाभार्थ्यांनी स्मार्टकार्ड काढण्यासाठी धावपळ सुरू केली आहे. एसटी कर्मचाऱ्यांच्या संपामुळे स्मार्टकार्ड मिळण्यास उशीर झाला. एसटी कर्मचाऱ्यांनी स्मार्टकार्ड नोंदणीला वेग दिला असला तरी आता त्याला सर्व्हर डाऊनचे ग्रहण लागले आहे. त्यामुळे ग्रामीण भागातील लाभार्थ्यांना याचा मोठा फटका बसत असून, त्यांना हेलपाटे मारावे लागत आहेत. स्मार्टकार्ड नोंदणीसाठी यापूर्वी एसटी आगाराबरोबरच खासगी एजंट व सेतू केंद्रांना परवानगी देण्यात आली होती. नंतर ही सोय एसटी आगारात करण्यात आली आहे.