सोलापूर : भारतीय हद्दीतील गलवान खोऱ्यात झालेल्या चीनच्या हल्ल्यात 16 बिहार रेजिमेंटचे कर्नल बी. संतोष बाबू यांना वीरमरण आले. देशासाठी बलिदान दिलेल्या या हुतात्म्याला सोलापूरचा 19 वर्षीय चित्रकला विद्यार्थी प्रतीक तांदळे याने सॅंड पोर्ट्रेटद्वारे अनोखी श्रद्धांजली वाहिली. 

हेही वाचा : पंढरीचा विठुराया बुधवारपासून उभारणार 24 तास 

प्रतीक तांदळे याने सोलापुरातील बाळेपासून दोन किलोमीटरवर असलेल्या खेडपाटी गावात ही प्रतिमा साकारली. त्याने 15 बाय 20 फुटांचा पृष्ठभाग पांढऱ्या रांगोळीने भरून काढला. त्यावर वाळू व दगडांच्या साह्याने (सॅंड पोर्ट्रेट) कर्नल बी. संतोष बाबू यांची प्रतिमा साकारली. तीन दिवसांपासून त्याची ही तयारी सुरू होती. प्रतिमा साकारल्यानंतर त्याने बी. संतोष बाबू यांना श्रद्धांजली अर्पण केली. 

हेही वाचा : लॉकडाउन शिथिलीकरणानंतर "या' उद्योजिकांचा जीव भांड्यात 

प्रतीकचे शिक्षण इयत्ता बारावी सायन्स झाले असून, लहानपणापासून चित्रकलेची आवड असल्याने त्याने चित्रकला विषयात करिअर निवडले. तो कुचन चित्रकला महाविद्यालयात चित्रकला फाउंडेशन कोर्स करत आहे. त्याला पेन्सिलीने पोर्ट्रेट बनवायची आवड आहे. मात्र वाळू शिल्पे व लाकडापासून व इतर साहित्यापासूनही विविध प्रतिमा साकारले जातात, याबाबतही त्याला उत्सुकता आहे. प्रतीकने सॅंड पोर्ट्रेट हा नवीन प्रकार आत्मसात केला. तो गहू व इतर धान्यापासून व्यक्तिचित्रे व कार्टून्स काढत असे. लॉकडाउनच्या काळातही तो असे विविध प्रयोग करत आहे. 

प्रथमच बनवले सॅंड पोर्ट्रेट 
15 जून रोजी भारतीय हद्दीतील गलवान खोऱ्यात चिनी सैनिकांनी केलेल्या भ्याड हल्ल्यात 20 भारतीय जवान ठार झाले. त्यात बी. संतोष बाबू यांचा समावेश होता. त्यांनी देशासाठी बलिदान दिले. त्यांना श्रद्धांजली वाहण्यासाठी मी प्रथमच सॅंड पोर्ट्रेट बनवले. चित्रकला फाउंडेशन कोर्स पूर्ण झाल्यानंतर जे. जे. स्कूल ऑफ आर्टमध्ये प्रवेश घेणार आहे. 
- प्रतीक तांदळे, 
विद्यार्थी