चळे (सोलापूर) : स्त्री म्हणजे शक्ती आणि तिची आराधना करणे म्हणजे पुण्य, असे पुराणात सांगितले आहे. पोटी एक मुलगी जरूर असावी, तिच्या जन्मावर आनंदाने बर्फी वाटावी, बेटी धनाची पेटी असे बाबाला गर्वाने वाटावे, असाच अभिमान चळे (ता. पंढरपूर) येथील डॉ. सुहास मोरे यांना वाटत आहे. त्यांना रविवारी (ता. 12) कन्यारत्न प्राप्त झाले. त्या कन्येच्या जन्माचा स्वागत सोहळा मोठ्या दिमाखाने डॉ. सुहास मोरे व मोरे परिवाराने साजरा केला. 

हेही वाचा : शेतकऱ्यांच्या दुधावरची साय खातंय कोण? खासगी संघ की शासन? दूध उत्पादक शेतकरी मात्र अडचणीत 

सोमवारी (ता. 13) गावातील मुख्य चौकामध्ये फटाके फोडून मुलीच्या जन्माचा स्वागत सोहळा साजरा करण्यात आला. तसेच डॉ. सुहास मोरे यांच्या क्‍लिनिकमध्ये जवळपास 150 ते 200 लोकांची मोफत आरोग्य तपासणी करण्यात आली. मोठमोठ्या शहरांमध्ये मुलीच्या जन्माचे स्वागत होत असताना ग्रामीण भागामध्ये सुद्धा डॉक्‍टरांनी व मोरे परिवाराने मुलीच्या जन्माचे स्वागत अशा अनोख्या पद्धतीने केल्याने मुलींचा सन्मान वाढण्यास निश्‍चितपणे मदत होणार आहे. 

हेही वाचा : धक्कादायक! कर्जबाजारीपणामुळे हॉटेल व्यावसायिकाची पत्नी व दोन चिमुकल्यांसह आत्महत्या; आत्महत्येपूर्वी लिहून ठेवली चिठ्ठी 

डॉ. मोरे यांचे पुणे येथील शेवाळवाडी येथे 2016 पासून हॉस्पिटल सुरू आहे. त्यांनी नेहमीच सामाजिक बांधिलकी जपली आहे. हॉस्पिटलची सुरवात झाल्यापासून शिवजयंती, 15 ऑगस्ट, 26 जानेवारी, बालदिन, महिला दिन या दिवशी त्यांनी त्यांच्या हॉस्पिटलमध्ये रुग्णांची मोफत आरोग्य तपासणी, रक्तगट तपासणी, महिलांची हिमोग्लोबिन तपासणी असे उपक्रम करत आहेत. काही महिन्यांपूर्वीच डॉ. मोरे यांनी चळे येथे क्‍लिनिक सुरू करून येथील रुग्णांची सेवा करत आहेत. रविवारी त्यांनी कन्या रत्नप्राप्तीचा आनंद मोफत आरोग्य तपासणी करून साजरा केला. या अनोख्या पद्धतीने मुलीच्या जन्माचे स्वागत केल्याने गावातील नागरिकांकडून कौतुक होत आहे. 

याबाबत डॉ. मोरे म्हणाले, काल आम्हाला कन्यारत्न प्राप्त झाले. तिच्या आगमनाचे स्वागत म्हणून आमच्या क्‍लिनिकमध्ये मोफत आरोग्य तपासणी केली आहे. सर्वांनीच मुलीच्या जन्माचे स्वागत केले पाहिजे. ही तपासणी करताना सोशल डिस्टन्सिंगचे काटेकोरपणे पालन करण्यात आले होते. 

चळेचे ग्रामस्थ पांडुरंग काळे म्हणाले, मी दवाखान्यामध्ये आलो असता डॉक्‍टरांना मुलगी झाल्यामुळे मोफत तपासणी करण्यात आली. सर्वांनी असा आदर्श घ्यावा. मुलीच्या जन्माचे स्वागत झाले पाहिजे. 

संपादन : श्रीनिवास दुध्याल