महूद (सोलापूर) : सांगोला तालुक्‍यातील कमलापूर येथे असलेल्या कोव्हिड केअर सेंटरमध्ये कोणत्याही प्रकारच्या सुविधा नाहीत. तेथे योग्य औषधोपचार होत नाहीत, तेव्हा महूद येथील नव्याने सापडलेल्या कोरोनाबाधित रुग्णांना तिकडे घेऊन जाऊ नका, असे म्हणत येथील नागरिकांनी रुग्णांना कमलापूरला नेण्यास मज्जाव केला. शेवटी पोलिसांना पाचारण केल्यानंतर या रुग्णांना कमलापूर येथे पाठवण्यात आले. महूद येथे मंगळवारी नव्याने सात रुग्णांची भर पडली आहे. 

हेही वाचा : खळबळजनक ! फिर्यादी मुलानेच केला साथीदारांच्या संगनमताने वडिलांचा निर्घृण खून; संजय काळे खून प्रकरणाचे 24 तासांत उकलले पोलिसांनी गूढ

कोरोनाबाधित रुग्णाच्या संपर्कातील तिघांचा अहवाल मंगळवारी पॉझिटिव्ह आला. त्यामध्ये एकाच घरातील तरुण व्यक्ती व दोन लहान मुलांचा समावेश आहे. या तिघांना सकाळी कमलापूर येथील कोव्हिड केअर सेंटरमध्ये पाठवण्याची तयारी सुरू असताना अचानक हे रुग्ण राहात असलेल्या प्रतिबंधित क्षेत्रातील नागरिक मोठ्या संख्येने विलगीकरण सोय असलेल्या प्राथमिक शाळेसमोर जमा झाले. त्यांनी कमलापूर येथील सेंटरबाबत अनेक तक्रारी मांडण्यास सुरवात केली. या वेळी कृती समितीमधील तलाठी, मंडलाधिकारी, सरपंच, उपसरपंच, पोलिस पाटील यांनी त्यांची समजूत काढण्याचा प्रयत्न केला. रस्त्यावर मोठ्या प्रमाणात गर्दी होऊन हा गोंधळ बराच वेळ सुरू होता. शेवटी पोलिसांना पाचारण करण्यात आल्यानंतर जमा झालेले लोक निघून गेले आणि रुग्णांना कमलापूर येथे रुग्णवाहिकेतून पाठवण्यात आले. 

हेही वाचा : "या' जिल्ह्यात वाढली "अँटिजेन'मुळे रुग्णसंख्या! मात्र मृत्यूदर आला दहावरून 5.5 टक्‍क्‍यांवर

मंगळवारी नव्याने महूद येथील आतारगल्ली भागात राहणारे एकाच घरातील चार जण पॉझिटिव्ह आले आहेत. त्यांची रॅपिड टेस्ट घेण्यात आली होती. त्यांनाही कमलापूर येथे पाठवण्यात आले आहे. त्यांच्या संपर्कातील इतरांना प्राथमिक शाळेत विलगीकरण करून ठेवण्यात आले आहे. महूद गावठाण पूर्णपणे प्रतिबंधित क्षेत्र म्हणून घोषित करण्यात आले असून एकूण रुग्णांची संख्या 10 झाली आहे. 

कोरोनाबाबत प्रशासन गंभीर नाही 
महात्मा फुले सहकारी सूत गिरणीचे अभिषेक कांबळे म्हणाले, महूद येथील प्रशासन कोरोनाबाबतीत गंभीर नाही. ग्रामपंचायत व आरोग्य विभाग यांच्यामध्ये समन्वय नसल्याने रुग्णसंख्या वाढत आहे. दाट लोकवस्तीत रुग्ण सापडल्यानंतर त्या परिसरातील सर्व नागरिकांची तपासणी होणे गरजेचे असताना, तपासणी केली जात नाही. महूद गावठाण प्रतिबंधित क्षेत्र म्हणून जाहीर केले असले तरी नागरिक सर्वत्र फिरताना दिसत आहेत. प्रतिबंधित क्षेत्रामध्ये स्वयंसेवकांच्या मदतीने सेवा पुरवणे आवश्‍यक आहे, मात्र त्याचे नियोजन दिसत नाही. ज्या ठिकाणी पॉझिटिव्ह रुग्ण सापडले आहेत, त्या ठिकाणचा परिसर प्रशासनाने निर्जंतुकीकरण केला नाही. याबाबत प्रशासनाविरोधात पालकमंत्र्यांकडे तक्रार करण्यात आली आहे. 

संपादन : श्रीनिवास दुध्याल