निपाणी (बेळगाव) : तालुक्यातील कांदा लागवड अंतिम टप्प्यात आली आहे. फेब्रुवारीच्या शेवटच्या आठवड्यात ही कामे संपणार आहेत. मात्र लागवडीचा खर्च वाढल्याने उन्हाळी कांद्याने शेतकऱ्यांच्या डोळ्यात पाणी आणले आहे. त्यामध्ये बियाणे आणि तरू दरही गगनाला भिडले आहेत. त्यात आता कांद्याला किती भाव मिळणार, याची चिंता शेतकरी वर्गाला लागली आहे.

तालुक्यात सौंदलगा, आडी, बेनाडी, आप्पाचीवाडी, कुर्ली, भाट नांगनूर, भिवशी, जत्राट भागात सर्वाधिक कांदा लागवड होते. शेती नसलेल्या काही शेतकऱयांनीही त्यासाठी फाळा पद्धतीने शेती घेतली आहे. शेतकरी दरवर्षी कांदा लागवडीसाठी 1800 ते 2000 रुपये किलोने कांद्याचे बियाणे खरेदी करतात. मात्र यंदा 3 ते 4 हजार रुपये द्यावे लागले आहेत. परिणामी लागवड खर्चात मोठी वाढ झाली आहे. परिणामी शेतकऱ्यांनी यंदा कांद्याला किमान 3000 रुपये प्रतिक्विंटल भाव मिळावा, अशी अपेक्षा व्यक्त केली आहे.

हेही वाचा - भारतीय बाजारपेठेचाच दिलासा: विदेशात गुलाबाला ‘रेड’ सिग्नल

देशातून कांद्यायाची निर्यात सुरू राहिल्यास अपेक्षित भाव निश्चित मिळू शकतो, असा विश्वास शेतकऱ्यांनी व्यक्त केला आहे. कांद्याला यंदाचा लागवडीचा आलेला खर्च एकरी 50 हजारांच्या घरात आहे. मजूर मिळत नसल्याने मोठा प्रश्न उभा राहिला आहे. खते, फवारणी, रासायनिक औषधांच्या वाढलेल्या दरामुळे देखील शेतकरी हैराण आहेत.

निर्यात धोरण आडमुठे 

शेतकऱ्यांच्या घरात कांदा होता, तेंव्हा शासनाने निर्यात बंद केली. कांदा संपल्यावर निर्यात सुरू करण्यात आली. केंद्र सरकारच्या या निर्णयामुळे तालुक्यातील कांदा उत्पादक शेतकयांचा रोष वाढला आहे. शासनाच्या आडमुठ्या धोरणामुळे कांदा उत्पादक शेतकऱयांना लागवड खर्च निघणेही कठीण झाले आहे.

"दरवर्षी 1800 ते 2000 रुपये किलोने कांद्याचे बियाणे आणून तरूची निर्मिती केली जात. पण यंदा 3 ते 4 हजाराने बियाण्यांची खरेदी केली. शिवाय तरुच्या निर्मितीसाठीही जादा खर्च आला आहे. त्यासाठी खर्चाच्या तुलनेत कांद्याला दर मिळणे आवश्यक आहे."
 

- सिद्धाप्पा जोडट्टी, कांदा उत्पादक शेतकरी, नवलिहाळ

हेही वाचा - ब्रेकिंग : पोलिस उप निरीक्षक लाचलुचपतच्या जाळ्यात

संपादन - स्नेहल कदम