संगमनेर : तालुक्‍याच्या पठार भागातील मोधळवाडी येथील अंगणवाडीतील मुलांसाठी आलेल्या शालेय पोषण आहार हंड्यातून घरी नेताना अंगणवाडी सेविका व मदतनीस आढळून आली. हा प्रकार समोर आल्यावर संतप्त ग्रामस्थांनी अंगणवाडीलाच कुलूप ठोकले. घारगावच्या बालविकास प्रकल्प अधिकारी वैशाली कुकडे यांनी मोधळवाडी येथे भेट देऊन दोन्ही कर्मचाऱ्यांवर निलंबनाची कारवाई केली. अंगणवाडी सेविका ताराबाई कुडेकर व मदतनीस पुष्पा थोरात अशी त्यांची नावे आहेत. 

हेही वाचा- अकोल्यातील ग्रामपंचायतीतील गैरव्यवहार, तीन अधिकारी दोषी

तालुक्‍यातील मोधळवाडी येथील अंगणवाडीतील शालेय पोषण आहारातील मसूर व हरभरा डाळ स्टीलच्या हंड्यात घालून घरी नेताना, मंगळवारी (ता.21) अंगणवाडी सेविका व मदतनिस महिलेला काही ग्रामस्थांनी पाहिले. ग्रामस्थांनी त्यांना जाब विचारत चोरलेला मुद्देमालाचा पंचनामा करून तो जप्त केला. अंगणवाडी सेविका आणि मदतनीस यांच्यावर कारवाई करण्याच्या मागणीसाठी ग्रामस्थांनी अंगणवाडीला कुलूप लावले. दोन्ही महिला कर्मचाऱ्यांवर कारवाई होईपर्यंत कुलूप न उघडण्याचा निर्धार ग्रामस्थांनी केला होता. 

हेही वाचा- विषय समितींच्या निवडी "या' कारणामुळे चौथ्यांदा लांबणीवर

दुसऱ्या सेविकेची नेमणूक

घारगावच्या बालविकास प्रकल्प अधिकारी वैशाली कुकडे यांनी बुधवारी (ता.22) मोधळवाडीला भेट दिली. या प्रकरणाची माहिती घेतली. अंगणवाडी केंद्रातील शिल्लक पोषण आहाराची रजिस्टरप्रमाणे मोजदाद केली असता, त्यात 2 किलो मसूर डाळ व अर्धा किलो हरभरा डाळ कमी असल्याचे आढळून आले. याप्रकरणी अंगणवाडी सेविका ताराबाई कुडेकर व मदतनिस पुष्पा थोरात यांचे लगेच निलंबन केले. त्यांच्या जागी तातडीने दुसऱ्या सेविकेची नेमणूक केल्याचे सांगितले. त्यानंतर अंगणवाडीचे कुलूप उघडण्यात आले. 

अंगणवाडीत पिशवी नेता येत नाही

अंगणवाडी सेविका आणि मदतनीस यांना अंगणवाडीत पिशवी अथवा पर्स नेता येत नाही. घारगाव प्रकल्प कार्यालयांतर्गत असणाऱ्या अंगणवाडीत जाताना पर्स किंवा पिशवी घेऊन जाणाऱ्या अशा सेविका आणि मदतनीस यांच्यावर कारवाई करण्यात येणार आहे. 
- वैशाली कुकडे, बालविकास प्रकल्प अधिकारी, घारगाव 

सुधारण्याची संधी मिळावी

अंगणवाडी सेविकांनी समर्पणवृत्ती व प्रामाणिकपणे सेवा करणे, अंगणवाडी संघटनेला अपेक्षित आहे. अशा प्रकारची चूक गंभीर आहे. मात्र, त्यांच्या सेवेचा कालावधी लक्षात घेता, योग्य ती कारवाई करून त्यांना सुधारण्याची संधी मिळावी. त्यांच्या रोजीरोटीवर गदा आणू नये. 
- ऍड. नीशा शिवूरकर, राज्य अध्यक्ष, अंगणवाडी कर्मचारी सभा