महाबळेश्वर : ढगाळ वातावरणातही गुलाबी थंडी अंगावर घेत निसर्गाच्या सानिध्यात मनमुराद आनंद लुटत सरत्या वर्षाला निराेप देऊन नववर्षाचे स्वागत करण्यासाठी पाचगणी महाबळेश्वर पर्यटकांनी फुल्ल झाले आहेत.
 

नाताळ आणि नवीन वर्षाच्या स्वागतासाठी येथील पर्यटन हंगाम बहरला असून, पर्यटकांची मोठी गर्दी झाली आहे. थंडी वाढली असूनही पर्यटक बाजारपेठेत फिरत आहेत. येथे गेल्या काही दिवसांपासून पर्यटकांची गर्दी वाढली असून, वेण्णा लेक येथे दिवसभर नौकाविहारासाठी पर्यटकांनी मोठी गर्दी केली होती.

गेल्या चार दिवसांपासून येथे नाताळ हंगाम सुरू झाला आहे. पहाटे विल्सन पॉइंट येथे सूर्योदयाचे विहंगम दृश्‍य पाहून दिवसभर वेण्णा लेक व विविध पॉइंटची सफर करून सायंकाळी सूर्यास्त पाहण्यासाठी पर्यटक येथील बॉंबे पॉइंट व कॅनॉट पिक येथे गर्दी करत आहेत.

नक्की वाचा - सातारा पाेलिस म्हणतात, है तयार हम I

सध्या थंडी देखील वाढली असून, धुक्‍याची दुलई पांघरलेल्याचे दृश्‍य येथे सर्वत्र पाहावयास मिळत आहे. सायंकाळी येथील बाजारपेठेत खरेदी व फेरफटका मारत कुटुंबासह आनंद घेताना पर्यटक दिसत आहेत. दिवसभर स्वेटरसह, पर्स, खेळणी खरेदी करत फिरताना येथील स्ट्रॉबेरीसह रानमेवा चाखत आहेत. मक्‍याचे भाजलेले कणीस, मका भजी, आईस्क्रीमसह बर्फ गोळ्यांचा आस्वाद घेताना पर्यटक घोड्यावरून रपेट मारताना सर्व ताणतणाव विसरून कुटुंबात रमताना दिसत आहे.

हेही वाचा - कणसे होंडातील 43 गाड्या चाेरीचे रहस्य उलगडले

पर्यटकांच्या स्वागतासाठी शहरातील बाजारपेठ देखील सजली असून, बाजारपेठेत सांताक्‍लॉज देखील फिरताना पर्यटक फोटो काढण्यात मग्न होत आहेत. महाबळेश्वर नगरपालिकेने स्वच्छता चोख ठेवली आहे. वाहतूक कोंडी व बाजारपेठेत जनावरांचा वावर मात्र त्रासदायक ठरत आहे. त्यामुळे सतत कोंडी होत आहे. पोलिस वाहतुकीची व्यवस्था करीत असूनही पर्यटकांची वाहने मोठ्या प्रमाणावर आल्यामुळे वाहतुकीची समस्या उद्‌भवत आहे.