अमरापूर (शेवगाव, नगर) : औरंगाबाद जिल्ह्यातील पैठणजवळ झालेल्या अपघातात ढोरजळगाव (ता. शेवगाव) येथील एकाच कुटुंबातील तिघांचा मृत्यू झाला. त्यामुळे संपूर्ण गावावर शोककळा पसरली आहे. 

हेही वाचा- धनंजय मुंडे म्हणतात, गड, गादी नि महंतांपेक्षा कोणीही मोठं नाही

इसारवाडी फाटा (ता. पैठण) येथे आज पहाटे कार व कंटेनरचा अपघात झाला. त्यात कारमधील ढोरजळगाव येथील बाळासाहेब निवृत्ती डाके (वय 45), अंबिका बाळासाहेब डाके (वय 40) या पती-पत्नीसह सुमनबाई रघुनाथ नरवडे (वय 60, रा. वरूर, ता. शेवगाव) यांचा जागीच मृत्यू झाला. या अपघाताची बातमी वाऱ्यासारखी गावात पसरली. 

समोरून येणाऱ्या कंटेनरची धडक

ढोरजळगाव येथील डाके त्यांच्या पत्नी अंबिका यांना घेऊन उपचारासाठी स्वतःच्या कारमधून (एमएच 12 सीके 3468) औरंगाबादला जात होते. सोबत त्यांच्या सासू सुमनबाई नरवडे याही सोबत होत्या. पहाटे चारच्या सुमारास पैठण-औरंगाबाद रस्त्यावरील इसारवाडी फाट्यावर समोरून येणाऱ्या कंटेनरची (जीजे 06 एजे 6851) त्यांच्या कारला धडक बसली.

हेही वाचा- कुंभार व्यावसायिकांवर "संक्रांत' 

उपचारासाठी नेताना तिघांचाही मृत्यू

ही धडक एवढी जबर होती की त्यात कार कंटेनरसोबत सुमारे पाचशे मीटरपर्यंत फरफटत गेली. त्यातील तिघांनाही कारचे दरवाजे कापून बाहेर काढण्यात आले. उपचारासाठी नेत असताना तिघांचाही मृत्यू झाल्याचे पैठण एमआयडीसी पोलिसांनी सांगितले. डाके दाम्पत्यावर सायंकाळी ढोरजळगाव येथे, तर नरवडे यांच्यावर वरूर येथे अंत्यसंस्कार करण्यात आले. 

कुटुंब पोरके झाले

बाळासाहेब डाके यांचे शेवगाव-पांढरी पूल रस्त्यावरील ढोरजळगावात टायर पंक्‍चर दुरुस्तीचे दुकान आहे. त्यांच्या एका मुलीचा विवाह झाला आहे. दुसरी मुलगी बारावीत शिक्षण घेते. पंधरा वर्षांचा मुलगा नववीमध्ये शिकत आहे. डाके दाम्पत्याच्या अपघाती मृत्यूमुळे हे कुटुंब पोरके झाले आहे.