सोलापूर ः जिल्हा परिषदेच्या कृषी व पशुसंवर्धन समितीचे सभापती मल्लिकार्जुन पाटील यांनी आपल्या जिल्हा परिषद सदस्यत्वाचा राजीनामा कॉंग्रेसचे माजी आमदार सिद्धाराम म्हेत्रे यांच्याकडे दिला आहे. मात्र, श्री. म्हेत्रे यांनी त्याचा इन्कार केला आहे. श्री. पाटील यांनी राजीनामा देण्याचे नाटक कशासाठी केले हा संशोधनाचा विषय आहे. 

हेही वाचा ः बागल गटाला आणखी एक धक्का? 

जिल्हा परिषदेच्या अध्यक्ष-उपाध्यक्ष पदाच्या निवडी नुकत्याच झाल्या. राष्ट्रवादीच्या राज्याच्या नेत्यांनी काहीही झाले तरी जिल्हा परिषदेचे अध्यक्ष-उपाध्यक्ष हे महाविकास आघाडीचे झाले पाहिजे असे आदेश दिले होते. मात्र, तशाप्रकारे करण्यात महाविकास आघाडीच्या स्थानिक नेत्यांना यश आले नाही. राष्ट्रवादीच्या स्थानिक नेत्यांनी फाजील आत्मविश्‍वास दाखविल्यामुळे हातातोंडाशी आलेला घास भाजप-समविचारी आघाडीने हिरावून घेतला आहे. भाजप-महाविकास आघाडीची सत्ता येण्यास अनेक विषय कारणीभूत ठरले आहेत. 

हेही वाचा ः सोलापूर झेडपीतील कॉंग्रेसचे तीन सदस्य अपात्रतेच्या वाटेवर... 

सभापती मल्लिकार्जुन पाटील यांनी अध्यक्षपदाच्या निवडीवेळी भाजप-समविचारी आघाडीचे उमेदवार शिवसेनेचे अनिरुद्ध कांबळे यांना मतदान केले आहे. कॉंग्रेस पक्षाने व्हीप बजावूनही श्री. पाटील यांनी कांबळे यांना मतदान केले आहे. माजी खासदार विजयसिंह मोहिते-पाटील व श्री. पाटील यांचे वडील (कै.) महादेव पाटील यांचे घनिष्ठ संबंध होते. तसेच संबंध मल्लिकार्जुन पाटील यांनीही कायम ठेवले आहेत. ही निवडणूक मोहिते-पाटील यांनी प्रतिष्ठेची केली होती. त्यामुळे मोहिते-पाटलांच्या प्रतिष्ठेला तडा जाऊ नये, यासाठी श्री. पाटील यांनी अध्यक्षपदाच्या निवडीत कांबळे यांना मतदान केले. उपाध्यक्ष पदाच्या निवडीवेळी श्री. पाटील यांनी त्यांचे मित्र व राष्ट्रवादीचे सदस्य विक्रांत पाटील यांना मतदान केले. अध्यक्ष व उपाध्यक्ष पदासाठी वेगवेगळ्या उमेदवारांना श्री. पाटील यांनी मतदान केले आहे. सभागृहात मतदान सुरू होताना कॉंग्रेसचे गटनेते संजय गायकवाड यांनी व्हीप जारी केला होता. मात्र, तो व्हीप झुगारत श्री. पाटील यांनी भाजप-समविचारी आघाडीच्या उमेदवाराला मतदान केले आहे. 

राजीनामा जिल्हाधिकाऱ्यांकडे द्यायचा असतो 
अध्यक्ष-उपाध्यक्षांच्या निवडी झाल्यानंतर काही दिवसांनी श्री. पाटील यांनी जिल्हा परिषद सदस्यत्वाचा राजीनामा देण्याचे नाटक केले आहे. पक्षाने आपल्यावर काहीही कारवाई करू नये यासाठी त्यांनी हे पाऊल उचलल्याचे बोलले जात आहे. त्यांनी आपले नेते माजीमंत्री म्हेत्रे यांच्याकडे राजीनामा दिला आहे. पण, म्हेत्रेंना राजीनाम्याच्या बाबतीत काहीच माहिती नाही. त्यामुळे श्री. पाटील यांचे राजीनामा नाट्य हे निव्वळ फार्स असल्याचे स्पष्ट होते. त्यांना खरोखरच राजीनामा द्यायचा होता तर त्यांनी तो माजीमंत्री म्हेत्रे यांच्याकडे देण्याऐवजी जिल्हाधिकाऱ्यांकडे का दिला नाही असाही सवाल उपस्थित होत आहे.