पिंपरी: राष्ट्रीय कॉंग्रेस पक्षाच्या पिंपरी-चिंचवड शहराध्यक्ष पदासाठी नुकत्याच मुलाखती घेण्यात आल्या. त्याला पंधरा दिवसांचा कालावधी उलटल्यानंतरही निर्णय झालेला नाही. आगामी महापालिका निवडणुकांच्या पार्श्‍वभूमीवर कार्यक्षम नेतृत्वाचा शोध संपणार केव्हा? अशी चर्चा आता पक्षातच सुरू झाली आहे.

महाविकास आघाडीच्या माध्यमातून राज्यात सत्ता स्थापन करण्यात महत्त्वाचा वाटा उचलल्यामुळे कॉंग्रेसला "अच्छे दिन' आले आहेत. मात्र शहरस्तरावर कॉग्रेसची स्थिती बिकटच आहे. शहराध्यक्ष सचिन साठे यांनी प्रतिकूल परिस्थितीत साडेसहा वर्षे अध्यक्षपदाची धुरा सांभाळली. ज्येष्ठ आणि युवा कार्यकर्त्यांचे संघटन केले. परंतु वैयक्तिक कारणांमुळे त्यांनी गेल्या महिन्यात राजीनामा दिला. तो मंजूर केल्यामुळे रिक्तपदासाठी 24 नोव्हेंबरला प्रदेश सरचिटणीस राजेश शर्मा आणि नाशिक शहर अध्यक्ष व पिंपरी-चिंचवडचे पक्ष निरीक्षक शरद आहेर यांनी 16 इच्छुकांच्या मुलाखती घेतल्या. त्याला कधी नव्हे ती आजी-माजी पदाधिकाऱ्यांनी गर्दी केली होती.

उपमहापौरांच्या खुर्चीला फळांचा हार; शेतकरी विरोधी विधान आले अंगलट

कदम, नेवाळे आणि पांढारकर यांच्यात चुरस
अनेक वर्ष पक्षातून गायब असलेल्या माजी नगरसेवकांनी मुलाखतीसाठी आवर्जून हजेरी लावली होती. दुसरीकडे ज्येष्ठ कार्यकर्ते अशोक मोरे, मनोज कांबळे, तुकाराम भोंडवे यांनी मुलाखत दिली असली, तरी त्यांची वर्णी लागण्याची शक्‍यता कमी असल्याची चर्चा आहे. इतर इच्छुकांमधील माजी नगरसेवक व इंटकचे जिल्हाध्यक्ष कैलास कदम, माजी शिक्षण मंडळाचे उपसभापती व टेल्को कंपनीचे माजी कामगार नेते विष्णूपंत नेवाळे आणि पिंपरी चिंचवड कॉंग्रेस समितीचे उपाध्यक्ष दिलीप पांढारकर यांच्या खरी चुरस असेल.

अध्यक्षांकडे इच्छुकांची "फिल्डींग'
प्रत्येकजण गुडघ्याला बाशिंग बांधून आहे. तर अन्य कार्यकर्ते नव्या अध्यक्षांच्या प्रतीक्षेत आहेत. आता साठे यांचे विरोधक इच्छुक असल्याने सातत्याने त्यांच्या संपर्कात आहेत. त्यांनी मनधरणी करण्याच्या प्रयत्नात आहेत. त्यामुळे अध्यक्ष नेमके कोणाच्या नावाला पसंती दर्शवितात. याकडे आता सगळ्याचे लक्ष लागले आहे. प्रक्रिया सुरू असून पक्षश्रेष्ठीच निर्णय घेणार असल्याचे त्यांनी स्पष्ट केले.

 म्हाडाच्या 5647 सदनिकांसाठी अर्ज नोंदणी उद्यापासून; उपमुख्यमंत्र्यांच्या हस्ते प्रारंभ

सध्या एकही नगरसेवक नाही
पिंपरी, चिंचवड, आकुर्डी, निगडी, भोसरी या पाच गावांची मिळून 1972 मध्ये नगरपालिका अस्तित्वात आली. त्यापूर्वी सर्व गावांच्या स्वतंत्र ग्रामपंचायती होत्या. त्या काळापासून नगरपालिकेचे रूपांतर महापालिकेत होईपर्यंत आणि राष्ट्रवादी कॉंग्रेसची स्थापना होईपर्यंत म्हणजेच 1998 पर्यंत महापालिकेत कॉंग्रेसची एकहाती सत्ता होती. मात्र, गेल्या वीस वर्षात कॉंग्रेस महापालिकेपासून दूर गेली. फेब्रुवारी 2017 च्या निवडणुकीत तर पक्षाचा एकही नगरसेवक निवडून आलेला नाही.

तातडीने निर्णय घेण्याची गरज
पक्षाने नवीन व्यक्तीला शहराध्यक्षपदाची संधी दिल्यास शहरातील वॉर्डाचा, प्रभागांची माहिती घेऊन तेथे पक्षाची ताकद कशी आहे, याचा अभ्यास करून पक्षवाढीसाठी नक्की काय करायचे, यासाठी संबंधित व्यक्तीला वेळ मिळणार आहे. त्यामुळे तातडीने निर्णय घेऊन पक्षाने शहराध्यक्ष जाहीर करण्याची गरज असल्याचा दावा केला जात आहे.

(edited by- pramod sarawale)