पुणे : शेतकऱ्यांना देशोधडीला लावून केलेला विकास आम्हाला अमान्य आहे. अनेक बड्या लोकांचे फार्महाऊस वाचविण्यासाठी नव्याने रिंगरोडची आखणी करण्यात आली आहे. नवीन आखणीमुळे मोठ्या प्रमाणात शेतकरी बाधित होत आहे. जुन्या आराखड्यानुसारच रिंगरोड करा, अशी मागणी करीत ‘तुम्ही जर तसे करणार नसाल, तर आमचा कडवा विरोध असेल,’ अशा शब्दांत भाजपचे प्रदेशाध्यक्ष चंद्रकांत पाटील यांनी रिंगरोडला मंगळवारी विरोध केला. (PCMC News)

रिंगरोडमुळे बाधित होणाऱ्या शेतकऱ्यांना घेऊन पाटील यांनी एमएसआरडीसीच्या अधिकाऱ्यांसोबत बैठक घेतली. या बैठकीला आमदार भीमराव तापकीर, शहर भाजपचे प्रवक्ते संदीप खर्डेकर, कुसगाव, रहाटवडे, मांडी, बहुली, मुठा, सांगरूण, कातवडी, वरदाडे, खामगाव मावळ, शिवगंगा खोऱ्यातील खोपी, कांजले, केलवडे व भोर या गावांमधील अल्पभूधारक शेतकरी उपस्थित होते.

पाटील म्हणाले की, देवेंद्र फडणवीस यांच्या सरकारने रिंगरोडचा जो आराखडा तयार केला होता, त्यात शेतकऱ्यांवर कोणत्याही प्रकारे अन्याय होत नव्हता. मात्र, महाविकास आघाडी सरकारने काही जणांचे हित डोळ्यासमोर ठेवून शेतकऱ्यांना देशोधडीला लावण्याचा घाट घातला आहे. अशाप्रकारे जर विकासकामे राबवली जाणार असतील; तर ते आम्हाला अमान्य आहे. त्यामुळे प्रस्तावित आराखडा रद्द करावा.

महाविकास आघाडीचे सरकार ‘हम करे सो कायदा’ या भूमिकेत वागत आहे. त्यामुळे सातत्याने विकासाभिमुख प्रकल्प तयार करण्याऐवजी, काही जणांचे हितसंबंध जपण्यासाठी काम करत आहे. राज्य सरकारच्या या धोरणामुळे जनता देखील त्रस्त आहे. आगामी काळात जनताच त्यांना त्यांची जागा दाखवून दिल्याशिवाय राहणार नाही. शेतकऱ्यांच्या आंदोलनाला आमचा पूर्ण पाठिंबा असेल.

- चंद्रकांत पाटील, प्रदेशाध्यक्ष, भाजप