वडगाव मावळ, ता. २० : मावळ तालुका कृषी उत्पन्न बाजार समितीच्या महाविकास आघाडीच्या नवनिर्वाचित संचालकांनी काँग्रेसचे प्रदेशाध्यक्ष नाना पटोले यांची भेट घेतली.
मावळ तालुका कृषी उत्पन्न बाजार समितीच्या निवडणुकीत महाविकास आघाडीच्या सहकार पॅनेलने १८ पैकी १७ जागा जिंकून वर्चस्व मिळवले. आघाडीच्या काही नवनिर्वाचित संचालकांनी जिल्हा बँकेचे संचालक माऊली दाभाडे यांच्या नेतृत्वाखाली मुंबई येथील काँग्रेस भवनात प्रदेशाध्यक्ष नाना पटोले यांची भेट घेतली. संभाजी राक्षे, संभाजी शिंदे, मारुती वाळुंज, विलास मालपोटे, शिवाजी असवले, शंकर वाघमारे, अमोल मोकाशी, विक्रम बोडके, नितीन बोडके, शांताराम लष्करी, जांभूळकर गुरुजी आदींचा त्यात समावेश होता. प्रदेशाध्यक्ष पटोले यांचा सत्कार करण्यात आला. आगामी लोकसभा निवडणूक व तालुक्यातील घडामोडींवर चर्चा करण्यात आली. लोकसभेची पुणे व मावळची जागा पक्षाला नक्की मिळेल, अशी माहिती पटोले यांनी दिली. तालुकाध्यक्ष पदाबाबत आठ दिवसांत निर्णय घेण्याचे आश्वासन पटोले यांनी दिले अशी माहिती माजी युवक अध्यक्ष विलास मालपोटे यांनी दिली.