पिंपरी : पवना नदीवरील अशुद्ध जलउपसा केंद्रातून निगडी जलशुद्धीकरण केंद्राशी जोडलेल्या जलवाहिनीतून बुधवारी सकाळपासून पाण्याची गळती सुरू आहे. गुरुवारी (ता. 11) सकाळी दहानंतर जलवाहिनीच्या दुरुस्तीचे काम हाती घेण्यात येणार असल्याने शहराच्या काही भागातील पाणीपुरवठा विस्कळीत होण्याची शक्‍यता महापालिका पाणीपुरवठा विभागाने वर्तवली आहे.
जलवाहिनीच्या दुरुस्तीमुळे पंपिंग बंद ठेवले जाणार असल्याने चिंचवडगाव, बिजलीनगर, पिंपरी कॅम्प, पिंपरी गावठाण, जुनी सांगवी, नवी सांगवी, पिंपळे गुरव, पिंपळे सौदागर, दापोडी या भागातील गुरुवारी सायंकाळ व शुक्रवारी सकाळचा पाणी पुरवठा विस्कळीत होण्याची शक्‍यता आहे.
पवना नदीवरील रावेत बंधाऱ्याजवळ महापालिकेचे अशुद्ध जलउपसा केंद्र आहे. 20 पंपांद्वारे येथून दररोज सुमारे 510 दशलक्ष लिटर अशुद्ध पाणी उचलले जाते. तेथून पाइपद्वारे निगडी- प्राधिकरणातील सेक्‍टर 23 मधील जलशुद्धीकरण केंद्रात पाठविले जाते. त्यानंतर शहरातील टाक्‍यांमध्ये वितरीत करून त्या-त्या भागात पाणीपुरवठा केला जातो. अशी महापालिकेची पाणीपुरवठा यंत्रणा आहे. शिवाय, एमआयडीसीकडून 30 दशलक्ष लिटर पाणी विकत घेतले जाते. दापोडी, फुगेवाडी, कासारवाडी, नाशिक फाटा व एमआयडीसी परिसरातील निवासी क्षेत्रात हा पाणीपुरवठा केला जातो.
दरम्यान, रावेत अशुद्ध जलउपसा केंद्रापासून निगडी- प्राधिकरण सेक्‍टर 23 मधील जलशुद्धीकरण केंद्रात अशुद्ध पाणी घेऊन जाणाऱ्या वाहिनीतून बुधवारपासून गळती सुरू झाली आहे. ही जलवाहिणी महापालिका पाणीपुरवठा टप्पा क्रमांक दोनमधील आहे. त्यातील पाणी तळती रोखण्यासाठी व जलवाहिनी दुरुस्तीसाठी या जलवाहिनीद्वारे होणारे पंपिंग बंद ठेवावे लागणार आहे. ते उद्या गुरुवारी सकाळी दहानंतर बंद ठेवून दुरुस्तीचे काम हाती घेण्यात येणार असल्याने पाणीपुरवठा बंद ठेवावा लागणार असल्याचे महापालिका पाणीपुरवठा विभागाने कळविले आहे.
जलवाहिनी दुरुस्तीसाठी अशुद्ध जलउपसा पंपिंग बंद ठेवल्यामुळे जलशुद्धीकरण केंद्रात पुरेसे पाणी पोचणार नाही. परिणामी, त्याचा परिणाम चिंचवडगाव, बिजलीनगर, पिंपरी कॅम्प, पिंपरी गावठाण, जुनी सांगवी, नवी सांगवी, पिंपळे गुरव, पिंपळे सौदागर, दापोडी या भागातील पाणी पुरवठ्यावर होणार आहे. त्यामुळे या भागातील गुरुवारी सायंकाळचा पाणी पुरवठा उशिराने, कमी दाबाने व विस्कळीत स्वरुपात होईल. दुरुस्तीचे काम लवकरात लवकर करून पाणीपुरवठा सुरळीत करण्याचा प्रयत्न केला जाणार असून नागरिकांनी उपलब्ध पाण्याचा जपून वापर करून महापालिकेस सहकार्य करावे, असे आवाहन पाणीपुरवठा विभागाने केले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.