बॉलिवूड अभिनेता आमिर खानचा मुलगा जुनैद खान याचा हा पहिलाच सिनेमा 'महाराज' असून गुजरात हायकोर्टानं या सिनेमाच्या प्रदर्शनाला गुरुवारी स्थिगिती दिली. या सिनेमाविरोधात हिंदू गटांनी हायकोर्टात याचिका दाखल केली होती. याचिकेत त्यांनी दावा केला होता की, या सिनेमात हिंदू वर्गाविरोधात काही गोष्टी दाखवण्यात आल्या आहेत. (Gujrat High Court stays release of Aamir Khan son Junaid Khan first film Maharaj which is going to release on netflix)

भगवान कृष्णाचे भक्त आणि वल्लभाचार्यांच्या अनुयायांच्यावतीनं (पुष्टीमार्ग संप्रदाय) दाखल केलेल्या याचिकेवर हायकोर्टानं ही स्थगिती दिली आहे. सन 1862च्या महाराज बदनाम प्रकरणावर आधारित हा चित्रपट कायदा-सुव्यवस्था बिघडवेल. तसेच हिंदू धर्माच्या अनुयायांविरुद्ध हिंसाचार भडकवेल असा आरोप या याचिकेतून करण्यात आला आहे.

चित्रपटाची कथा काय?

याचिकेतील दाव्यानुसार, सन 1862 मध्ये एका प्रतिष्ठित महाराजानं केलेल्या कथित गैरवर्तणुकीमुळं हे प्रकरण पेटलं होतं. त्यावर तत्कालीन मुंबईच्या कोर्टातील इंग्लिश न्यायाधीशांनी यावर निकाल दिला होता. यामध्ये हिंदू धर्माविरोधात आणि भगवान श्रीकृष्णाविरोधात टिप्पणी केली होती. त्यामुळं याला विरोध होऊ नये म्हणून हा सिनेमा गुप्तपणे प्रदर्शित केला जात आहे. जर या चित्रपटाच्या प्रदर्शनाला परवानगी दिल्यास हिदूंच्या धार्मिक भावना गंभीरपणे दुखावल्या जातील, त्यामुळं कधीही भरून न येणारं नुकसान होईल, असा युक्तिवादही करण्यात आला.

यावर गुजरात हायकोर्टाच्या न्यायमूर्ती संगीता विषेन यांनी याचिकाकर्त्यांच्या याचिकेची दखल घेतली आणि कोणत्याही प्रकारे चित्रपटाच्या प्रदर्शनाला स्थगिती देण्याचा अंतरिम आदेश दिला. आता या प्रकरणाची 18 जून रोजी पुन्हा सुनावणी होणार आहे.

'बॉयकॉट नेटफ्लिक्स' ट्रेंड

दरम्यान, सोशल मीडियावर 'बॉयकॉट नेटफ्लिक्स' ट्रेंड सुरु होता. नेटफ्लिक्स 'हिंदूविरोधी' कन्टेंटचा प्रचार करत असल्याचा आरोपही सोशल मीडियातून केला आहे. पण नेटफ्लिक्सनं गेल्या महिन्यात या सिनेमाबाबत काढलेल्या प्रसिद्धी पत्रकानुसार, महाराज चित्रपट हा पत्रकार आणि समाजसुधारक करसनदास मुलजी यांच्यावर आधारित आहे. महिलांच्या हक्कांसाठी आणि सामाजिक सुधारणांसाठी काम करणारे ते अग्रगण्य वकील होते.