Noor Malabika Das : 'द ट्रायल' या वेब सिरीजमध्ये महत्त्वपूर्ण भूमिका साकारलेल्या अभिनेत्री नूर मालबिका दासचं निधन झालं असून काहीच तासांपूर्वी तिचा मृतदेह सडलेल्या अवस्थेत पोलिसांना तिच्या राहत्या घरात सापडला. तिने आत्महत्या केलं असल्याचं म्हंटलं जात असून पोलीस या प्रकरणी अजून तपास करत आहेत.

नूरच्या मृत्यूच्या बातमीने बॉलिवूडमध्ये सध्या खळबळ उडालीय.जाणून घेऊया नूरच्या बॉलिवूडमधील प्रवासाविषयी.

कोण होती नूर मालबिका दास ?

बॉलिवूडच्या झगमगत्या दुनियेत प्रवेश करण्यापूर्वी नूरने कतार एअरवेज कंपनीत एअर होस्टेस म्हणून काम केलं होतं. ती मूळची आसामची होती. तिने वेगवेगळ्या माध्यमातून अभिनय आणि डबिंग क्षेत्रात काम केलं. सिस्कीयां, तिखी चटणी, वॉकमन, जघन्या उपाया, चरमसुख, देखी अनदेखी, बॅकरोड हसल अशा अनेक प्रोजेक्टस्मध्ये नूरने काम केलं आहे. काजोल आणि जिसू सेनगुप्ता यांची मुख्य भूमिका असलेल्या ट्रायल सिनेमात तिने अखेरचं काम केलं होतं. त्यानंतर तिचा कोणताही नवा प्रोजेक्ट प्रेक्षकांच्या भेटीस आला नव्हता.

शेवटच्या सोशल मीडिया पोस्टची चर्चा

नूर तिच्या सोशल मीडिया अकाऊंटवर बऱ्यापैकी सक्रिय होती. तिने अखेरची पोस्ट पाच दिवसांपूर्वीच शेअर केली होती. तिने स्वतःचं रील शेअर केलं होतं आणि त्याला कॅप्शन दिलं होतं कि,"इथे फक्त माझाच चेहरा आहे ज्याचं कुणाशीच साम्य नाहीये आणि मला माझ्या सौंदर्याची जाणीव होण्यासाठी स्वतःला आरशात बघण्याची गरज लागत नाही. माझ्यासाठी आरसा हे जग आहे जे कधीतरी गोड आणि सुंदर असत तर कधी विचित्र, कधी खेळकर, कधी मस्तीखोर असतं आणि त्याप्रमाणेच तुम्ही जगायचं असतं. "

नूरच्या मृत्यूमागचं नेमकं कारण अजून समजू शकलं नसलं तरीही पोलिसांनी आत्महत्या असू शकते असा अंदाज वर्तवला आहे. या प्रकरणी पोलीस अजून तपास करत आहेत. आज सकाळी नूरच्या खिडकीतून दुर्गंध आल्यानंतर शेजाऱ्यांनी पोलिसांकडे तक्रार केली. पोलिसांनी दरवाजा उघडल्यानंतर तिचं निधन झाल्याचं समोर आलं आहे.