पुणे : दहावीपर्यंत मराठीतून शिकलो. अकरावीला विज्ञान शाखेत प्रवेश घेतल्यामुळे इंग्रजीतून शिक्षण आले. समजायला थोडा उशीर झाल्यामुळे तेव्हा कमी टक्के पडले. यंदा बारावीच्या दृष्टीने चांगला अभ्यास केला होता. पण आता परिक्षाच रद्द झाली आहे. कोरोनाच्या दृष्टीने या निर्णयाचं स्वागत होत असलं तरी यामुळे आमच्या शैक्षणिक कारकिर्दीवर मोठा परिणाम होणार आहे, निखिल पवार या विद्यार्थ्याच्या या मताप्रमाणं अनेक विद्यार्थ्यांनी अशाच संमिश्र प्रतिक्रिया दिल्या आहेत. महाराष्ट्र राज्य माध्यमिक आणि उच्च माध्यमिक शिक्षण मंडळाच्यावतीने घेतली जाणारी बारावीची परिक्षा रद्द करण्यात आली आहे. त्या पार्श्वभूमीवर सकाळने परीक्षार्थी विद्यार्थ्यांशी संवाद साधला. (12 th exam canceled it is ok but what about the impact students remark)

एकीकडे कोरोनाच्या पार्श्वभूमीवर हा निर्णय महत्त्वाचा असल्याचे विद्यार्थी म्हणत होते. त्याचवेळी यामुळे आम्हाला आयुष्यभर 'कोवीड बॅच' म्हणून सामोरे जावे लागले. आमच्या प्रत्येकाच्याच परिश्रमाचे योग्य मूल्यमापन होईलच असे नाही, असेही विद्यार्थी म्हणत होते. अथर्व पाटील म्हणतो,‘‘दीड वर्षापासून अभ्यास करत होतो. पण एक प्रकारे हा निर्णय योग्य आहे. आम्हाला योग्य तो गृहपाठ देऊन गुणांचे मूल्यमापन व्हायला हवं. टक्केवारीच्या दृष्टीने आम्हाला फटका बसणार आहे.’’

सौरभ पिसे हा विद्यार्थी म्हणाला, परिक्षा व्हायला पाहिजे होती. आमचे मूल्यमापन नक्की कसा होणार?, पुढचा प्रवेश कोठे घ्यायचा?, कसा घ्यायचा? याबद्दल अजूनही संभ्रम आहे. कोरोना कमी झाल्यानंतर जुलैमध्येही परिक्षा घेणे शक्य असते. तर बारावी असल्यामुळे खूप अभ्यास केला होता. निश्चितच तो परिक्षा रद्द झाली म्हणून वाया जाणार नाही. पुढले प्रवेश परिक्षांसाठी त्याचा उपयोग होईल. पण ज्या मुलांना अशा प्रवेश परिक्षा नाही त्यांना मात्र समस्या जाणवू शकते, असं निशिगंधा दिवान या विद्यार्थिनीनं सांगितलं. अपेक्षा झनझने ही विद्यार्थिनी म्हणाली, अभ्यास झाला होता. तरी परिक्षा रद्द झाली हे एक प्रकारे बरंच झाले. आमच्या आरोग्याच्या दृष्टीने योग्य निर्णय आहे. आता मी पुढल्या प्रवेश परिक्षांचा अभ्यास करत आहे.