जुन्नर : घन कचरा व्यवस्थापन अंतर्गत केंद्र व राज्य सरकारच्या अनुदानातून कचरा संकलनासाठी पाच नवीन वाहने जुन्नर नगर पालिकेने खरेदी केली आहेत. 

नगराध्यक्ष शाम पांडे, आरोग्य सभापती अंकिता गोसावी, नगरसेवक व कर्मचाऱ्यांच्या उपस्थितीत आज (ता. 29) या वाहनांची नगराध्यक्ष पांडे यांनी पूजा केली. जुन्नर पालिकेच्या स्वच्छता गीतासह, नागरिकांना कचरा वर्गीकरणाच्या सूचना देण्याची सोय नवीन घंटागाड्यात असल्याचे मुख्याधिकारी डॉ. जयश्री काटकर व आरोग्य विभाग प्रमुख प्रशांत खत्री यांनी सांगितले.

आरोग्य विभागा मार्फत जुन्नर शहरातील विविध प्रभागात घरोघरी जाऊन दररोज कचरा संकलन करण्यात येते. या गाड्यांची प्रत्येकी 720 किलो इतकी कचरा संकलन क्षमता आहे. ओला व सुका कचरा संकलनासाठी स्वतंत्र कप्पे गाडीत आहेत.याबरोबर हायड्रोलिकच्या सहाय्याने कचरा खाली करण्याची सोयही असल्याचे त्यांनी सांगितले.

या सर्व घंटागाड्यांवर लाऊडस्पीकरच्या साहाय्याने कचरा वर्गीकरणाच्या सूचनाही देण्यात येणार असून नागरिकांनी घरातच कचऱ्याचे ओला व सुका असे वर्गीकरण करून घंटागाडीत द्यावा असे आवाहन आरोग्य निरीक्षक खत्री यांनी केले.