पुणे : जुलैच्या मध्याला पावसाने ओढ दिल्यामुळे शहराला पाणीपुरवठा करणाऱ्या खडकवासला धरणसाखळीत सध्या जेमतेम साडेआठ अब्ज घनफूट (टीएमसी) पाणीसाठा आहे. केवळ पुणे शहरासाठी हा साठा चार ते पाच महिने जाईल. परंतु शहरासोबतच काही ग्रामपंचायती आणि संस्थांना पाणीपुरवठा केल्यास तो सप्टेंबरअखेरपर्यंत पुरेल, अशी माहिती खडकवासला पाटबंधारे विभागाने दिली. 

यंदा जून महिन्यात मॉन्सूनचे वेळेवर आगमन झाले. परंतु त्यानंतर शहराला पाणीपुरवठा करणाऱ्या धरणांच्या पाणलोट क्षेत्रात कमी पाऊस झाला. त्यामुळे धरणांतील पाणीसाठ्यात कमालीची घट झाली आहे. 

- कोरोनाचा असाही परिणाम; आता रेशीमगाठी जुळतायेत व्हिडीओ कॉन्फरसवर​

गेल्या जून महिन्याच्या मध्यास पावसाळा सुरू झाल्यानंतर खडकवासला प्रकल्पात सुमारे सहा टीएमसी पाणीसाठा होता. एक महिन्यानंतर म्हणजे 15 जुलैला या प्रकल्पातील खडकवासला, वरसगाव, पानशेत आणि टेमघर या चार धरणांत सध्या एकूण 8.56 टीएमसी (29.39 टक्के) पाणीसाठा आहे. गतवर्षी याच तारखेला 13.55 टीएमसी (46.48 टक्के) पाणीसाठा होता. 

- अमोल कोल्हे यांचे स्वप्न होणार पूर्ण...या प्रकल्पाला हिरवा कंदील​

खडकवासला प्रकल्प सद्यस्थिती : 
(धरण, पाणीसाठा टीएमसीमध्ये आणि कंसात टक्केवारी) : 
खडकवासला : 0.90  (72) 
पानशेत : 3.78  (35.54)
वरसगाव : 3.34  (26.04)
टेमघर : 0.54  (14.60)

- पुणेकरांनी एक महिना रोखली अपेक्षित रूग्णवाढ​

पुणे महापालिका खडकवासला धरणातून दररोज सुमारे 1400 'एमएलडी' पाणी उचलत आहे. खडकवासला प्रकल्पातील पाणीसाठा पाहता शहराला सप्टेंबर अखेरपर्यंत अडचण येणार नाही. खरीप हंगामासाठी पावसाळी आवर्तन सुरू केलेले नाही. परंतु उपलब्ध पाणीसाठ्यातून प्रकल्पावर अवलंबून असलेल्या काही ग्रामपंचायती आणि संस्थांनाही पिण्यासाठी पाणी उपलब्ध करून द्यावे लागेल.
- विजय पाटील, कार्यकारी अभियंता, खडकवासला पाटबंधारे विभाग.

- पुण्याच्या बातम्या वाचण्यासाठी येथे ► क्लिक करा
(Edited by : Ashish N. Kadam)