Pune Loksabha election 2024 : पुण्यात भाजपकडून मतदारांना पैसे वाटल्याचा आरोप काँग्रेसकडून होत आहे. काँग्रेसचे उमेदवार रवींद्र धंगेकर हे सहकार नगर पोलिस ठाण्यात धरणे आंदोलनाला बसले आहेत.

सहकार नगर पोलीस स्टेशनच्या हद्दीतील झोपडपट्टी परिसरात भाजपकडून पैसे वाटप होत असल्याचा आरोप आमदार रवींद्र धंगेकर यांनी केला आहे. या प्रकरणी तक्रार करूनही पोलीस कारवाई करत नसल्याचा धंगेकरांचा आरोप आहे. पोलीस प्रशासनाविरोधात रवींद्र धंगेकर आक्रमक झाले आहेत. त्यांनी सहकारनगर पोलीस ठाण्यातच ठिय्या मांडला आहे.

रविवारी रात्री उशिरापर्यंत आमदार रवींद्र धंगेकर यांचं सहकार नगर पोलीस ठाण्यातच धरणे आंदोलन सुरुच होतं. जोपर्यंत पोलीस पैसे वाटप करणाऱ्यांवर कारवाई करत नाहीत तोपर्यंत पोलीस ठाण्यातून उठणार नाही, अशी भूमिका त्यांनी घेतली आहे.