बारामती : लोकसभा निवडणूकीच्या पार्श्वभूमीवर अतिरिक्त पोलिस अधीक्षक जयंत मीना यांची जोरदार कारवाई सुरुच आहे. आज मांडवगण फराटा, शिरुर परिसरात निवडणूकीच्या पार्श्वभूमीवर लोणंद व नीरा परिसरातून अवैधरित्या दारु विक्रीसाठी नेली जाणार असल्याची माहिती पोलिसांना मिळाली होती.

जयंत मीना तसेच उपविभागीय पोलिस अधिकारी नारायण शिरगावकर यांच्या सूचनेनुसार सहायक पोलिस निरिक्षक चंद्रशेखर यादव, फौजदार साळुंखे, पोलीस कर्मचारी शिवाजी निकम, संदीप जाधव, दशरथ कोळेकर, स्वनिल अहिवळे, अभिजित एकशिंगे, संदीप कारंडे, शर्मा पवार, सदाशिव बंडगर यांनी मोरगावच्या चौकात सापळा रचला होता. 

आज इको गाडीतून दारुचे बॉक्स अवैधरितीने वाहतूक करताना पकडण्यात आले. या कारवाईत 40 देशी दारुचे बॉक्स, 38 हजार रुपये रोकड, दोन मोबाईल हँडसेट असा एकूण तीन लाखांचा ऐवज जप्त केला. या प्रकरणी धनंजय मानसिंगराव काकडे, अभिजीत भारत कोटे (दोघेही रा. नीरा, ता. पुरंदर) व सूरज दत्तात्रय जाधव (रा. सोमेश्वर, ता. बारामती) यांच्यावर पोलिसांनी गुन्हा दाखल केला आहे.