खेड-शिवापूर : "येथील खेड-शिवापूर टोलनाका बनावट पावत्या प्रकरणाची राष्ट्रीय महामार्ग प्राधिकरणानेही (एनएचएआय) स्वतंत्रपणे चौकशी सुरू केली आहे. या चौकशीचा अहवाल आल्यानंतर संबंधितांवर कारवाईची कार्यवाही करण्यात येईल," असे 'एनएचएआय'चे प्रकल्प संचालक सुहास चिटणीस यांनी सांगितले.

हेही वाचा - 'स्मार्ट सिटीं'च्या रॅंकिंगमध्ये पिंपरी-चिंचवडने टाकले पुण्याला मागे

पुणे-सातारा रस्त्यावरील खेड-शिवापूर टोल नाक्यावर काही दिवसांपूर्वी बनावट पावत्यांचे प्रकरण उघडकीस आले होते. त्यात हा टोलनाका 'एनएचएआय'चा आहे. टोल नाक्यावर बनावट पावत्यांचा मोठा गैरप्रकार झालेला असताना 'एनएचएआय' या प्रकरणावर कोणती भूमिका घेणार? असा प्रश्न निर्माण झाला होता. या पार्श्वभूमीवर 'एनएचएआय'चे प्रकल्प संचालक सुहास चिटणीस यांनी टोलवरील या बनावट पावत्या प्रकरणाची आमच्याकडून चौकशी सुरू असल्याचे सांगितले.

चिटणीस म्हणाले, "टोल नाक्यावर बनावट पावत्या प्रकरण कसे घडले, त्याला कारणीभूत कोण आहे, याची आमच्या अभियंत्याकडून चौकशी सुरू आहे. हा चौकशी अहवाल आम्हाला प्राप्त झाल्यानंतर तो आमच्या वरिष्ठ कार्यालयाकडे पाठविण्यात येईल. त्या अहवालानुसार संबंधीतांवर कारवाईची कार्यवाही करण्यात येईल."

हेही वाचा - ताज महलमध्ये बॉम्ब ठेवल्याची अफवाच; नोकरभरती रद्द केल्याच्या रागातून केला प्रताप

टोलची वसुली अजून किती दिवस?"खेड-शिवापूर टोल नाक्यावर बनावट पावत्या प्रकरण उघडकीस आल्यानंतर हा टोल नक्की कोणाच्या खिशात जातो? असा प्रश्न मनात निर्माण झाला आहे. टोल नाक्यावर असे गैरप्रकार करून टोलचे पैसे चोरायचे आणि टोलचा बोजा प्रवाशांच्या माथी मारायचा, असा प्रकार सुरू होता. खेड-शिवापूर टोलवरून आत्तापर्यंत किती रक्कम वसूल झाली. किती रक्कम वसूल करणे बाकी आहे आणि किती रक्कमेच्या टोलची चोरी झाली, या गोष्टी आम्हाला समजल्या पाहिजेत," अशी मागणी नागरीक करत आहेत.

(संपादन : सागर डी. शेलार)