मार्केट यार्ड (पुणे)  : आवळा हा अनेक आजारावर गुणकारी समजला जातो. त्यामुळे आवळ्याला ग्राहकांकडून कायम मागणी असते. मागील काही दिवसांपासून आवळ्याचा हंगाम सुरू झाला आहे. बाजारात सध्या नगर जिल्ह्यातून आवक होत आहे. घाऊक बाजारात प्रतिकिलोला १५ ते ४० रूपये दर मिळत आहे. तर किरकोळ बाजारात आवळा ५० ते ६० रुपये प्रतिकिलो विकला जात आहे.
 विद्यार्थ्यांच्या खात्यात आठवडाभरात पैसे जमा होणार; धनंजय मुंडे यांची घोषणा​

दरवर्षी आवळ्यापासून आवळा कॅन्डी, आवळा सुपारी, आवळा ज्यूस, लोणच्यासाठी कंपन्यांकडून मोठ्या प्रमाणात मागणी असते. परंतु, यंदा अनेक कंपन्यांकडे माल शिल्लक आहे. त्यामुळे सध्या बाजारात आवळ्याला फक्त फळविक्रेते, घरगुती ग्राहकांकडून मागणी आहे. यंदा सर्वत्र पाऊस चांगला झाला असल्याने आवळ्यांच्या झाडांना फळधारणा अधिक आहे. पुढील काही दिवसांत अजून आवक वाढेल. आवक वाढल्यानंतर मात्र घाऊक बाजारातील दरात काही अंशी घट होईल अशी माहिती व्यापारी माऊली आंबेकर यांनी दिली.

Rainfall : गेल्या २४ तासात महाबळेश्वरमध्ये सर्वाधिक पावसाची नोंद!

आवळ्याचा हंगाम दरवर्षी ऑगस्टमध्ये सुरू होतो. त्यानंतर बाजारात डिसेंबरपर्यंत आवळ्याची आवक सुरू राहते. सध्या बाजारात दररोज २ ते ४ टनाची आवक होत आहे. येत्या पंधरा दिवसांत पुणे आणि सातारा जिल्ह्यातून आवळ्याची आवक सुरू होईल. आवक वाढल्यानंतर रोज ७ ते ८ टनाची आवक होऊ शकते. दर वर्षी संपूर्ण हंगामात आवळ्याच्या प्रतिकिलोला प्रतवारीनुसार २० ते ३० रूपये दर मिळाला होता. सद्य:स्थितीत आवळ्याचा दर्जा चांगला आहे. दरही समाधानकारक मिळत असल्याचेही आंबेकर यांनी सांगितले.