नारायणगाव (पुणे) : पुणे येथे उपचार घेत असलेल्या जुन्नर तालुक्यातील वारूळवाडी येथील कोरोनाबाधित रुग्णाचे आज सकाळी निधन झाले. त्यामुळे मागील तीन दिवसांत वारुळवाडी येथील दोन जणांचा कोरोना संसर्गाने मृत्यू झाला आहे. कोरोना संसर्गामुळे जुन्नर तालुक्यात झालेला हा सहावा मृत्यू आहे, अशी माहिती वैद्यकीय अधिकारी डॉ. वर्षा गुंजाळ यांनी दिली.

काय सांगता, पुणे झेडपीला डाॅक्टर आणि नर्स मिळेना...

कोरोनाने मृत्यू झालेल्या वारूळवाडी येथील दोन्ही व्यक्ती तरुण होत्या. आज मृत्यू झालेली वारूळवाडी येथील व्यक्ती मंचर येथील एका को-ऑपरेटिव्ह क्रेडिट सोसायटीमध्ये व्यवस्थापक म्हणून कार्यरत होती. मागील चोवीस तासात
नारायणगाव आरोग्य केंद्राअंतर्गत असलेल्या नारायणगाव, वारुळवाडी, ओझर नवीन गावठाण या गावात प्रत्येकी तीन, धालेवाडी गावात एक, आर्वी गावात चार, असे एकूण चौदा कोरोनाबाधित आढळून आले आहेत. मागील 25 दिवसांत नारायणगाव आरोग्य केंद्रा अंतर्गत असलेल्या नारायणगाव, वारुळवाडी, धनगरवाडी, धालेवाडी, आर्वी, हिवरे बुद्रुक, येडगाव, ओझर परिसरात सुमारे नव्वद कोरोना पॉझिटिव्ह आढळून आले आहेत. त्यापैकी दोन जणांचा मृत्यू झाला आहे. 

पुणे जिल्ह्यातील अंगणवाडी, शाळा दुरुस्तीसाठी एवढा निधी मंजूर

हा भाग मार्च ते २० जूनअखेर कोरोनामुक्त होता. मागील पंचवीस दिवसांत या भागांत कोरोना रूग्णांची संख्या वाढली आहे. प्रशासनाला गुंगारा देत मुंबई येथून आलेले नागरिक, लग्न समारंभ, खरेदी, कटींगच्या निमित्ताने एकमेकांच्या सानिध्यात आल्याने या भागात कोरोना संसर्ग वाढला असल्याचे निष्पन्न झाले आहे. प्रशासनाने नारायणगाव, वारुळवाडी परिसर कंटेनमेंट झोन जाहीर केला आहे. मात्र, या भागातील बहुतेक नागरिक अजुनही नियमांचे पालन करत नसल्याने कोरोना संकट दिवसेंदिवस अजुन गडद होण्याचा धोका आहे. 

आपल्या हितासाठी नागरिकांनी नियमांचे पालन करून प्रशासनाला सहकार्य करावे, असे आवाहन डॉ. गुंजाळ, सहायक पोलिस निरीक्षक अर्जुन घोडे पाटील, नारायणगावचे सरपंच योगेश पाटे, वारुळवाडीचे उपसरपंच सचिन वारुळे यांनी केले आहे.
 
Edited By : Nilesh J Shende