जेजुरी (पुणे) : अयोध्येत बुधवारी श्रीराम मंदिर बांधकामाचे भूमिपूजन होणार आहे. त्यासाठी महाराष्ट्राचे कुलदैवत असलेल्या श्री क्षेत्र जेजुरी येथील खंडोबाचा बेल भंडार आज पाठविण्यात आला.

फी कपातीसाठी मेल भेजो आंदोलन

खंडोबाचे निस्सीम भक्त असलेल्या उमाजीराजे नाईक यांच्या रामोशी समाजातील कार्यकर्त्यांनी गडावरून हा भंडार आणला होता. विश्व हिंदू परिषदेच्या वतीने आज कार्यकर्त्यांनी एकत्र येऊन खंडोबा प्रतिमेचे पूजन केले. खंडोबा देवाच्या स्वयंभू लिंगावरील आणलेला बेलभंडार अयोध्येकडे रवाना करण्यात आला. विश्व हिंदू परिषदेचे प्रांत धर्मप्रसारक राजेंद्र चौधरी, किरण बारभाई, वैभव लांघी यांनी कार्यक्रमाचे आयोजन केले होते.

कोरोना मृतांवरील अंत्यसंस्काराचे बील कोण देणार
 
या वेळी सन १९९२ मध्ये अयोध्येला गेलेले कारसेवक मनोहर भापकर, प्रकाश खाडे यांच्या हस्ते खंडोबाच्या व श्रीरामाच्या प्रतिमेचे पूजन केले. त्यानंतर उपस्थित कार्यकर्त्यांनी प्रभू रामचंद्रांचा जयजयकार केला. राजाभाऊ चौधरी यांनी पुणे येथे आचार्य भास्करगिरी महाराज यांच्याकडे भंडार अयोध्येला नेण्यासाठी सुपूर्द केला. या वेळी अविनाश मरकळे, पराशर मोरे, संतोष शिवले आदी उपस्थित होते.

पुण्याच्या इतर बातम्या वाचण्यासाठी येथे क्लिक करा

दरम्यान, बुधवारी पहाटे खंडोबा गडामध्ये पूजा अभिषेक केला जाणार आहे. गावातील राम मंदिर, कडेपठारचे राम मंदिर, हनुमान मंदिर व सर्वच मंदिरांमध्ये कार्यकर्ते पूजा करून दिवे लावणार आहेत. जेजुरीत सर्वत्र २०० किलो साखर वाटून आनंद साजरा केला जाणार आहे, अशी माहिती संयोजकांनी दिली. राम मंदिराच्या भूमीपूजनावेळी गडावर सनई चौघडा व नगारा वाजविण्यात येणार आहे.