कडूस (पुणे) : खासगी रुग्णालयांमध्ये उपचार घेणाऱ्या रुग्णांवर अवाजवी देयके थोपविण्यात येत असल्याच्या तक्रारी खेड तालुक्यात येऊ लागल्या आहेत. या तक्रारींची दखल घेण्यासाठी तालुक्यात यंत्रणाच नसल्याने रुग्णांसह रुग्णांच्या कुटुंबीयांना नाहक मनस्ताप सोसावा लागत आहे. खासगी रुग्णालयांच्या अवास्तव देयकांची समस्या लक्षात आणून दिल्यानंतर तालुकास्तरावर समितीची स्थापना करण्यात आली आहे. तहसीलदारांच्या नेतृत्वाखाली पाच जणांची समिती स्थापन केल्याची माहिती प्रभारी प्रांताधिकारी सुनील गाढे यांनी दिली.
खेड तालुक्यात कोरोनाने थैमान घातले आहे. तालुक्यातील रुग्णांची संख्या साडेबाराशेच्या वर गेली आहे. रुग्णांना उपचारासाठी खासगी रुग्णालयांचा आधार घ्यावा लागत आहे. याचाच फायदा खासगी रुग्णालये घेऊ लागली आहे. खासगी रुग्णालयात उपचार घेणाऱ्या रुग्णांची लूटमार वाढली आहे. कोरोना तपासणीच्या नावाखाली, ऑक्सिजन बेड उपलब्ध नसल्याचे कारण सांगून तसेच अगोदर पैसे भरायला सांगून रुग्णांची लूट सुरू असताना यावर नियंत्रण ठेवणारी शासकीय यंत्रणा तालुक्यात कुठेच दिसत नाही. याबाबत विचारणा करूनही अधिकारी माहिती देत नसल्याने तक्रार कोणाकडे मांडायची, असा प्रश्न रुग्ण व त्यांच्या नातेवाईकांना पडला आहे. अधिकारी लक्ष देत नसल्याने संगनमताने लूट सुरू आहे की काय? असा संशय रुग्ण व नातेवाईक व्यक्त करीत आहे.
रुग्णांना अवास्तव देयके मिळत असल्याचा आणि याकडे तालुकास्तरावर अधिकारी लक्ष देत नसल्याचा मुद्दा जिल्ह्यातील वरिष्ठ अधिकाऱ्यांच्या काही माध्यम प्रतिनिधींनी पुराव्यासह लक्षात आणून दिल्यानंतर तालुकास्तरावर वैद्यकीय देयकांच्या बाबतीत दक्षता समिती स्थापना करण्याचा निर्णय घेण्यात आला. त्यानुसार प्रभारी प्रांताधिकारी सुनील गाढे यांनी तहसीलदारांच्या नेतृत्वाखाली समिती स्थापन केली आहे. यात चांडोली (राजगुरूनगर), चाकण, आळंदी ग्रामीण रुग्णालयाचे वैद्यकीय अधीक्षक व तालुका वैद्यकीय अधिकारी यांचा समावेश आहे.
ही समिती खासगी रुग्णालयांच्या अवाजवी देयकांच्या तक्रारीची चौकशी करणार आहे. देयकांची छाननी व शासनाच्या अधिसूचनेतील निर्देशाप्रमाणे चौकशी करून कारवाई करणार आहे. शासनाने खासगी रुग्णालयांतील खाटांची संख्या आणि उपचारांचे दर निश्चित केले आहेत. त्यात साधारण खाटा, अतिदक्षता विभाग, जीवरक्षक प्रणालीच्या बाबतीत दर ठरवले आहेत. मात्र, खासगी रुग्णालये या नियमांना बगल देत लाखांची देयके देत आहेत. खासगी रुग्णालयांनी दरपत्रक निश्चित करून भिंतीवर लावले पाहिजे. रुग्णांनी लुटीविरोधात तक्रार करण्याचे आवाहन प्रांताधिकारी गाढे यांनी केले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.