पुणे : ''शिवसेना नेते संजय राऊत यांना अमेरिकेचे राष्ट्राध्यक्ष म्हणून पाठवणार'' असं मला कळतंय, अशा मिस्कील शब्दात भाजपचे प्रदेशाध्यक्ष चंद्रकांत पाटील यांनी राऊत यांना आज चिमटा काढला.

''पाटील हे नागालँडचे राज्यपाल होणार असल्याचे माझ्या कानावर आले आहे. त्यामुळेच त्यांनी माजी मंत्री म्हणू नका असं म्हटलं असावं'', असा टोला शिवसेना खासदार संजय राऊत यांनी पाटील यांना लगावला होता. त्यांच्या या वक्तव्याला प्रत्युत्तर देताना पाटील यांनी हे वक्तव्य केले. भांडारकर प्राच्यविद्या संस्थेच्या सभागृहात आयोजित एका कार्यक्रमानंतर पाटील यांनी पत्रकारांशी संवाद साधला.

त्यावेळी राऊत यांच्या विनोदी टीकेला, चंद्रकांत पाटील यांनीही विनोदी शैलीतच उत्तर दिलं आहे. तर मुख्यमंत्री उद्धव ठाकरे यांनी केलेल्या वक्तव्यावर प्रतिक्रिया देताना पाटील म्हणाले, मुख्यमंत्र्यांच्या यांच्या मनात काय सुरू आहे हे समजण्याइतपत मी मनकवडा नाही. माहीत नाही ते का असं म्हणाले. मात्र राऊतांना कोणी फार गंभीरतेनं घेत नाही, असा टोलाही पाटील यांनी लगावला.

''मला माजी मंत्री म्हणू नका. पुढील दोन-तीन दिवसांत कळेल'', असे पाटील यांनी गुरुवारी मुंबईत एका कार्यक्रमादरम्यान म्हटले होते. त्यांच्या या विधानाचे अनेक अर्थ काढले जात आहेत. पाटील यांच्या विधानाबद्दल भाष्य करताना संजय राऊत यांनी त्यांना टोला लगावला होता. या विधानाबाबत विचारले असता पाटील म्हणाले, ''मी ते विधान करून केवळ एक दिवस उलटला आहे. अजून काही तास बाकी आहेत.''